Barca-in Real hnaih zel

Inrinni zan Spanish La Liga inkhelah Barcelona chuan khualmualah Granada CF chu 3-1 a hnehin Real Madrid nen a an inthlauhna an ti zim zel.

Barca tan Ivan Rakitic, Luis Suarez leh Lionel Messi te'n goal khat ṭheuh an khung a, Granada tan Rico Castro chuan penalty aṭangin goal khat a thun ve bawk.

Barca hian league match 25 khel tawhin point 59 an hmu tawh a, hmahruaitu Real Madrid chuan point 60 an hmu tawh thung. An inthlauhna hi Pathianni zana Real leh Villarreal inkhel result a zirin ala danglam leh ang.

Inkhel chu

Barca-in ball an chang tam nghal a, ṭan aṭangin inkhel an thunun hle. Argentine mid­fielder Javier Mascherano leh Ivan Rakitic te'n hun ṭha an hmu nghal, mah se goal erawh an hlawhchhuak nghal bik lo.

Suarez ball cross chu minute 24-naah Rakitic chuan hnai set sawt aṭangin goal a khung. Barca-in hma an hruai a, first half-ah goal dang a lut tawh lo mikhualin 1-0 in hma an hruai.

Second half-an ṭan aṭanga minute thum pawh a ral hmain Liverpool striker hlui Suarez-a'n Barca goal hnihna a khung zui a. He goal hi first half-a goal khungtu Rakitic siamsak a ni ve thung.

Minute 53-naah Castro chuan penalty aṭangin goal khat a khung ve a, Granada lamin point hmu turin goal khat dang an thun belh a la ngai. Mahse Granada tlarhnung ten Messi an dang zo lo, minute 70-naah goal a khung. He goal pawh hi Suarez thawhrah a ni a, Barca goal thumah Uruguayan forward hi a inrawlh vek. Inkhel tawp thlengin goal a lut tawh lo a, 3-1 in mikhual Barca an chak.

Thil dang

Granada hian League match 25 khelh tawh aṭangin point 19 an hlawhchhuak tawh a, table-ah a hnuai ber dawtah an awm mek. An team hian tun season-ah league goal 16 chuah an la thun a, hei hi Messi goal khung aiin goal 11-in a tlem zawk.

Messi hian tun season La Liga-ah goal 28 a thun tawh a, ani ai a thun tam chu goal 29 khung tawh Real Madrid star Cristiano Ronaldo a ni.

Champions League-a Manchester City laka goal hnih khungtu Suarez hian he inkhelah hian goal khat a khung bakah a ṭhain te goal thun tur ṭum hnih a siam sak bawk.

Kum 28-a upa Uruguay striker hian Barca tan match 24 khel tawhin goal 10 a thun tawh a, a ṭhiante goal thun tur ṭum 14 zet a siamsak tawh bawk.

Barcelona hian tun season-ah La Liga-ah goal 70 an thun tawh a, heng zing a goal 49 te hi an tlar hma Messi, Suarez leh Neymar te thun a ni.

Boss thukhawchang

Barcelona manager Luis Enrique chuan, "England-ah inkhel turin kan kal a, match hautak tak kan hmachhawn hnu lawkah League match a awm chhunzawm leh si a kan chau hle a ni. Mahse kan nauten an theih tawp an chhuah a point thum kan hmu thei hi ka lawm hle. suarez khan a khel ṭha em em a, Man City lakah a ṭhat zia a lantir tawh a, zaninah khan a thiam zia kan hmu nawn leh a ni," tiin a striker chu a fak hle.