Neuer tel lo se chuan result a dang ang - Robben

Zirtawpni zan khan Allianz Arena-ah Bayern Munich-in FC Cologne 4-1 in an hneh a. Bayern winger Arjen Robben chuan keeper Manuel Neuer tel lo se chuan result a dan theih thu a sawi.

German champion tan Bastian Schweinsteiger-a'n minute thumna lekah a tauh lut a, minute 10-naah Frank Ribery-a'n yard 20 aṭangin kawh takin a pet lut bawk. First half tawp hma hretin Cologne beiseina siam turin Anthony Ujah-a'n goal khat a khung.

Amaherawhchu, minute 67-naah Robben-a'n tun season-a a goal 19-na a tauh lut a, minute 75-naah Robben-a cross chu Robert Lewandowksi-a'n a awm hmanga ti goal lehin Bayern 4-1 in an chak.

Inkhelh banah Robben chuan, "Inkhel danglam tak niin ka hria. Bul kan ṭan ṭha a, goal hnih kan thun hma hle. Chak chiang turin goal dang kan mamawh a, mah se goal dang kan khung thei lo a, goal khat kan chhuah bawk. Second half kan ṭan ṭha lo a, Manuel Neuer khan ṭha tak takin a dang zui a. Manuel kha awm lo se chuan inkhel result kha a dang thei a ni," tiin point hloh thei an nih thu a sawi.

Inkhel dangah Hoffenheim-in Kevin Volland leh Eugen Polanski goal hmangin Mainz 2-0 in an hneh a, Bayer Leverkusen-in Simon Rofles goal hmangin Freiburg 1-0 in an hneh a, hetiang zat bawk hian Hetha Berlin-in Augsburg an hneh bawk.

Goal khat ve ve khungin Hannover leh Suttgart an inhnehtawk a, Eintracht Frankfurt-in Hamburger 2-1 in an hneh bawk.