England an tlawm leh ta

2015 ICC World Cup-ah England an che fuh hleithei lo a, match li an khelh tawhah a vawi thumna atan an tlawm. Nimin khan England hian wicket kua laiin Sri Lanka an hneh lo.

Wellington Regional Stadium, New Zealand-a inkhelah hian England-in mi paruk hlohin run 309 an vawchhuak a, hei hi Sri Lanka-in over 47.2-ah mi pakhat chiah hlohin an umpha a ni. Lahiru Thirimanne chuan Sri lanka tan run 139 zet a vawchhuak a ni.

Ṭhumvawrah Eng­land a vannei zawkah an ṭang a, bat hmasak zawk an thlang. England hian over 50-ah run 309 vawchhuakin mi paruk an hloh a, an khel chhe lo. England tana run siam hnem ber Joe Root chuan century siamin ball 150-a hmachhawnah run 121 a vawchhuak a, dinhmun duhawm takah England a hlangkai.

Mahse, England batsman-te an chet ṭhat laiin an bowler-ten Sri Lanka batsman-te an ngam lo a, over 47.2 an vawm chhungin mi pakhat chiah an vawm out thei. Lahiru Thirimanne chuan Sri Lanka tan ball 143 hmachhawnin run 139 a vawchhuak a, a tawp thlengin a dam. Sri lanka tan veteran Kumar Sangakkara pawh a hun takah a rawn par chhuak a, ball 86 lekah run 113 a vawchhuak a, a tawp thleng a dam bawk a ni.

Kumar Sangakkara hian World Cup-ah run 1259 a siam tawh a, World cup chanchina run siam hnem ber pathumna a ni.