Lyon an chak zo lo

Inrinni zan Ligue-1 in­khelah hmahruaitu Lyon-in an khingpui Lille 2-1 in an hneh lo a, an hnuai chiaha awm Paris Saint-Germain tan hmahruaitu nihna hun ṭha an siam sak.

Stade Pierre-Mauroy-a inkhelah hian Lyon midfielder Corentin Tolisso chuan mikhual team tan minute thumna lekah goal a khung a, goal dang luhbelh tawh loin chawlhlawk an hmang.

Second half an ṭan a, Lille hun a herchhuak ve thung. Idrissa Gueye chuan Marcos Lopes nen an in one-two hnu lawkah mawi takin goal a khung. Minute thum a liam hman awrh tihin Lopes hian yard 20 vela hla aṭangin Lille hmahruaina leh chakna goal ni zui ta chu a khung bawk a ni. Tunhnai Ligue-1 match 12 an khelhah Lyon hi an vawi khat tlawmna a ni.

Kum 2008 a an Ligue-1 title hnuhnung ber latu Lyon hi tun season-ah champion tura dinhmun duhawm takah an awm mek laiin an chak zo ta si lo. Nizana inkhel PSG leh AS Monaco result a zirin an dinhmun hi danglam thei a ni.

Lyon hian khelh 27-ah point 54 an nei a, PSG hian vawi 26 khelh tawhah point 52 an nei thung a, nizana an result a zirin Lyon hi an lehpel thei dawn a ni.