New Zealand-in Australia an ngam

Inrinni zing khan ICC World Cup thlengtu ram pahnih an inkhel a,New Zealand-a ding­chang zawkah ṭangin Australia chu wicket khatin an hneh.

Eden Park, Auckland-a inkhelah hian batsman aiin bowler-te an langsar zawk a, Australia tan fast bowler Mitchell Starc-a'n wicket ruk lai la mah se a team a chakpui zo chuang lo.

Toss-a vannei zawk Australia-in bat hmasak an thlang a. An batsman te'n New Zealand bowler te an ngam lo a, kum 25-a upa Trent Boult chuan wicket nga lai lain Australian batsman te a ngam hle.

Australia tan Brad Haddin a ding rei viau dawn emaw tih laiin ball 41-ah run 43 a vawchhuak tihin a out. Australia in over 32.2 thleng an tlin a, run 151 chiah vawchhuakin an vaiin an out vek.

Heti zat lek run hi New Zealand lam hian awlsam takin an umpha mai dawn emaw tih laiin Australian bowler te'n an thiam thil an 'show' ve thung a, kum 25-a upa Mitchell Starc chuan run 28 chiah pein wicket ruk zet a la.

Mahse, New Zealand batsman-te an che chhe vek lo. Captain Brendon McCullum chuan team kaihruaitu a nih chhan tilangin ball 24 a hmachhawnah run 50 a vawchhuak a, Kane Williamson chuan ball 42-ah run 45 vawchhuakin a tawp thlengin a dam bawk. Hemi te pahnih chet ṭhat zar hi zoin New Zealand hian over 23.1-ah run 152 vawchhuakin mi pakua an hloh a, a tawpah a vannei zawkah an ṭang ta a ni.

Australia leh New Zealand te hian Chappell–Hadlee Trophy an inchuh ṭhin. 2014–15 season-ah World Cup-ah chiah ram pahnih hi an inhmachhawn dawn avangin team pahnih inremnain World Cup match ni mah se Chappell–Hadlee Trophy an inchuh a, New Zealand an chak.