Pakistan-in Zimbabwe an hneh

ICC World Cup 2015-ah Pakistan-in chak hmel an hmu ve leh ta a, Pathianni zing khan Zimbabwe chu run 20 in an hneh.

Brisbane Cricket Ground-a inkhelah hian ṭhumvawra vannei zawk Pakistan-in bat hmasak an thlang a, captain Misbah-ul-Haq chuan ball 121 a hmachhawnah run 73-a vawchhuak. Pakistan tan fast-bowler Wahab Riaz a che ṭha. Wahab hian wicket li a lak mai bakah ball 46 a hmachhawnah run 54 a vawchhuak bawk a ni. Pakistan hian over 50-ah mi pasarih hlohin run 235 an vawchhuak.

Zimbabwe in hei hi an um a, over 49.4-ah an vaiin an out vek a, run 215 an tlin thei hram a ni. Pakisatn bowler zingah Mohammad Irfan-a che ṭha bawk a, run 30 chiah pein wicket li a la thei a ni.

He inkhela 'man of the match' a thlan Pakistan fast bowler Wahab Riaz hi Pakistani zinga World cup match khata wicket li la chunga run 50 siam tling thei hmasa ber a ni.