India-in awlsam takin UAE an hneh

ICC World Cup 2015-ah India-in an theihna an lan tir zel a, Inrinni chawhnu khan UAE chu awlsam taka hnehin super-eight an lut chiang ta.

WACA ground, Perth-a inkhelah India tan Ravichandran Ashwin a cheṭha chhunzawm zel a, South Africa laka wicket thum lai latu Ashwin hi UAE batsman te'n an ngam lo hle. Wicket li lai lain India a chakpui.

Ṭhumvawrah UAE a vannei zawkah an ṭang a, bat hmasak an thlang. UAE batsman-te'n India bowler te an ngam ngang lo a, over 31.3-ah run 102 siamin an out fai vek. UAE tan captain Shaiman Anwar meuh pawh a che hleithei lo. An game hmasa pahniha Zimbabwe leh Ireland an khelh ṭuma run vaw chhuak hnemtu hian ball 49-ah run 35 a vawchhuak hman awrh tihin a naute tan a ding tlang zo lo.

India bat hun a thleng. Tunhnaia che ṭha lo Rohit Sharma chuan ball 55 a hmachhawnah run 57 vawchhuakin a tawp thleng a dam. Amah thlawptu kumin World Cup-a che ṭha em em mai Virat Kohli a lo khel ṭha ve leh zel bawk nen over 18.5 lekah an target run 102 an umphak nghal a, wicket khat chiah hlohin awlsam takin India an chak ta a ni.

Inkhel behbawm:

UAE run siam zat hi ICC World Cup 2015 a team khatin run an siam tlem ber a la ni. A hmaa tlem ber dinhmun hauhtu chu England niin New Zealand lakah khan run 123 chiah an tlin thei a ni.

Kum 1996-a Netherlands an hneh hnuin UAE hian World Cup-ah chak hmel an la hmu ve rih lo.

UAE players tam zawk hi eizawn nana cricket hmang lem lote an ni hlawm. An thiamna chu dah ṭha ta ila, an sum lak luh zat pawh hi khaikhin chi a ni lo, a inthlau vet vet hle a ni.

India bowler-te hian match thum chhungin wicket 30 an la ta.

Eng nge an sawi?

India captain MS Dhoni chuan, "A hun takah kan bowler-te an che ṭha a ni. Bowling lama kan innghahna ten innghahna ngam an nih zia min hmuh tir a, hei hian kan game khelh apiangah buaina an tawh loh zia a ti lang chiang hlein ka hria," tiin an bowler-te fak hle.

UAE captain Mohammad Tauqir chuan, "India bowler-te khan min tibuai takzet a ni. Run 200 aia tam hi chu siam ve theih mai kan inbeisei laiin Ashwin kha a khel ṭha em em a, kan ngam ta ngang lo a ni," a ti.

Australia seamer ṭhin Terry Alderman chuan, "India kha bat hmasa se chuan run 400 aia tam an siam thei ang tihah hian ka chiang a ni," a ti.

Australia all-rounder ropui ṭhin Brad Hogg chuan, "India hi an za zek zek ni berin ka hria a, an inkhelh apianga an ṭang em em mai hi a ropui lai chu a ni. An fielding-in hma an sawn em em a, vawiin match-ah te khan an khel ṭha em em a ni," tiin India fielding a fak.