Tuikual South an chak

Samsung 3:16 Plan Solution Mizoram Super League-ah Tuikual South-in an theihna an pholang a, an match hma­sa bera inhnehtawk tak chunga Khatla TBL an hneh loh hnuin 83-62 in Chaltlang Ryders an hneh.

Chaltlang hian Tuikual South hi kil tinah an hneh lo a ni ber a, quarter tinah Tuikual South hian hma an hruai thei a ni. Tuikual South tan an captain F.Zodinthara'n captain a nih chhan rawn tilangin a nau te a kaihruai ṭha hle. TBL an khelh ṭuma langsar lo Dina hian points 22 a team tan rawn hlawhchhuakin rebounds 19 lai a nei bawk.

Chlatlang Ryders tan captain Lalmuanpuia Zote a dan pangngaiin a che ṭha a, points 20 hlawhchhuakin rebounds pariat a nei a, a ṭhiante'n an thlawp ṭhat tawk loh avangin a team-te a chakpui zo lo.

Eng nge an sawi?

Tuikual South coach KC Lalliantluanga chuan, "Tuikual South tak tak kan la hmu lo, tuna aia ṭha zawk hi kan la nei thei. Kan khelh dan hi duhthusam chu a ni la ni thei tak tak lo, mah se hmasawnna chu ka hmu. Ka lawm khawp mai," tiin an khelh dana a lungawi thu a sawi.

Player ni bawk KC-a chuan sawi chhun­zawmin, "Kan depart­ment Mizoram State Sports Council lam aṭangin harstana engmah awm lo a, hetia kan 'concern discipline-a' coaching-te pe a hun ka hmang thei hi kan hotute chungah ka lawm hle. Tin, Tuikual South mipuite ṭawiawmnaah pawh ka lawm em em bawk a ni. Club Board leh hruaitute, fans club-te chungah an support-naah ka lawm em em bawk. A tawp berah chuan player-te, theihtawp a hmasawn tuma beitute, champion châk a tuihal te hi ka chhuang em em a ni," a ti.

Ryders asst coach Marc Lalthlamuana Sailo chuan, "Kan tlawmna chhan ni a kan hriat chu, kan zuam sual ve niin ka hria. Kan big man ho kan dah lut lo a, rebound-ah kan hneh lo lutuk a. Tin, an shoot zawng zawng kha a lut deuh vek a, a luh loh ṭumin offensive rebound an la leh bok si. Kan la khel fuh tawk lo a ni," a ti a, an match thumnaah chuan chak ngei an tum tawh thu a sawi tel bawk.