Sawi zui hlawh Brown-a red card

Inrinni zana Man­chester United leh Sun­derland an inkhelh ṭumin United player hlui Wes Brown chuan red card a hmu a, he red card hian sawi zui a hlawh hle.

United forward Radamel Falcao-a'n penalty a hlawhchhuak a, referee Roger East-a'n Colombian forward ti tlutu John O'Shea aiah West Brown an hnawhchhuak. Sunder­land leh United player-te'n referee thutlukna a dik lo tih sawi mah se East hian a thutlukna a thlak lo.

Premier League referee enkawltu board Professional Game Match Officials Limited chuan, "Kha inkhela referee Roger East khan Brown zawk kha foul emaw a tih vangin red card a pe a ni," tiin thuchhuah an siam.

Sunderland manager Gus Poyet chuan, "Na­kinah a video hi kan en leh anga, kan khinglet dawn leh dawn loh kan tichiang ang," a ti.

Manchester United manager Louis van Gaal chuan, "A tisual palh ve nimaiah kan ngai. Mihring hian tihsual palh chang kan nei ṭhin a, kei pawhin tihsual chang ka nei ṭhin. Thil thleng palh thei a ni," a ti.

Sunderland hian an khinglet a, thiam an chang a nih chuan 'red card' hi O'Shea zawkin a hmu ang. Professional foul a nih vangin match khat chauh hrem a ni bawk ang.

Season hmasa khan hetianga referee-in hnawh­chhuah loh tur zawk an hnawhchhuah hi a lo thleng tawh. Stamford Bridge-ah Arsenal leh Chelsea inkhelin Alex Oxlade-Chamberlain chuan Eden Hazard ball pet a lo khawih a, he inkhela referee Andre Marriner chuan hmu sualin Arsenal defender Kieran Gibbs zawk a hnawtchhuak daih.

Arsenal-in FA hnenah an zualko a, red card hi Chamberlain an hmuh tir a. English midfielder hand ball luih kha goal tur a nih loh avangin Chamberlain pawh hi hrem zui a ni lo. Arsenal an vannei a, Gibbs leh Chamberlain-te hrem loin an chhuak.