Old Trafford-ah United an chak hram

Manchester United-in hnehna an chang hram a, Louis van Gaal-a enkawl United hriat thiam har tual tual.

Inrinni zan Premier League inkhelah Manchester United-ah Wayne Rooney goal hnih hmangin Sunderland 2-0 in an hneh. United captain goal hmasa zawk hi penalty a ni a, referee Roger East-a'n United player hlui John O'Shea aiah a tisual lotu zawk Wes Brown a hnawhchhuak daih.

Inkhel ṭan tirhah Man­chester United player manto rual ni loin Sunderland player Connor Wickham leh Jermain Defoe -te langsar hmasa a, United keeper David de Gea a che ṭha bawk.

Minute 16-naah United tan Ashley Young chuan chance ṭha tak nei mah se, goal a pet khum. United game a buai a, ball an in pass fuh hleithei lo a, player-te an khelh dan an bel lo a, chiang taka pass sual hmuh tur a awm fo. Goal awm loin chawlhlawk an hmang.

Second half-ah Angel di Maria aiah Adnan Januzaj a rawn tut a, United lam an zia deuh. Minute 66-naah Ander Herrera ball vawrh chu Radamel Falcao-a'n penalty area-ah ṭha taka dawng sawngin defender John O'Shea a vir khum a, United player hlui hian Colombian forard hi ti tluin penalty a chawi. Referee-in hnai tak aṭangin thlir mah se a bul lawka awm Wes Brown chu red card a pe daih.

United tan Wayne Rooney a rawn pen chhuak a, goal sirah kawh pawtin a pet goal, 1-0 a ni.

United boss-in goal luh hmain Marouane Fellaini luh tir a tum tawh a, goal luh hnuah a ngaihdan a thlak lo. Goal luhna tura thawhhlawk Falcao la chhuakin Fellaini a luh tir.

United tam zawkna a lang a, Sunderland an bet tial tial a, Adnan Januzaj ball pet Sunderland keeper Costel Pantilimon-a dan per chu Rooney-a'n a tauh lut a. Minute 84-naah 2-0 a ni a, goal khungtu Rooney aiah Juan Mata luh tir a ni zui bawk.

Injury time-ah Ander Herrera-a'n goal a khung a, amahrawhchu offside vangin pawm a ni lo a, 2-0 in inkhel a tawp.

Inkhel chhehvel

Manchester United laka tlawm Sun­derland hi tunhnaia khel chhe tak an ni a, tunhnai Premier League match sawmah vawi khat chiah hnehna an chang.

Wayne Rooney erawh a ropuina belhchhahin a awm zel a, Premier League season 11 chhung a zawna kum tin goal sawm aia tam khung thei hmasa ber a ni ta. Inrinni zana a goal hnih khung hi match khata goal hnih a khung vawi 33 na a ni bawk.

Eng nge an sawi?

Manchester United mana­ger Louis van Gaal chuan, "Bul kan ṭan ṭha lo hlein ka hria. Swansea City kan hneh loh khan min la nghawng deuh pawh a ni maithei. Mahse, second-half aṭangin kan khel a zia chho ṭan a, goal chance tam tak insiamin goal hnih lai kan khung ta a ni," a ti.

Sunderland manager Gus Poyet chuan, "Penalty kha inkhel thlak danglam vektu a ni," a ti.