LBS Suzuki CYMA Volleyball : Bungkawn nge ropui dawn Kanan?
LBS Suzuki CYMA Volleyball semifinal-ah record nei ṭha pahnih Bungkawn leh Kanan te an inkhel dawn a, vawiin chhun dar 12:00 hian R. Dengṭhuama Hall-ah an inkhel ang. Hemi zawh hian Armed Veng South leh Vaivakawn ten final khel tur an zawng bawk dawn.
CYMA Volleyball-ah Bungkawn leh Kanan te hi vawi sarih ve ve an champion tawh a, a chak zawk tan record thar siamna remchang a awm dawn. Vawiin hi ropui inchuhna hun a ni a, an veng mipuite pawhin an ṭawiawm ṭhat a pawimawh ang. Inkhel en man hi Rs 50 chauh a ni.
Record chu
Mizo volleyball legend Vardingliani awmna veng Kanan hi tun dinhmuna CYMA Volleyball-a sulhnu nei ṭha ber an ni a, vawi sarih an champion bakah vawi riat final-ah vanduai.
An thiampuinu Dingdingi'n kumin May 30 khan volleyball khelh a chawlhsan thu a puang. Tun ṭum inelnaah tel tawh lo mah se Kanan record tarlan apiangin India aiawh pawha khel tawh Dingdingi hming lam rik hi a inhmeh hle.
Kanan ropui ṭhin mah se tun hnai inelna hnuhnung pahnihah Bungkawn an champion a, record thar siam thei dinhmunah an ding. Bungkawn hian final an ngam a, vawi riat final an khelh aṭangin vawi sasrih an champion.
A hmuhnawm dawn
Kanan hian champion ngei tumin training pawh an nei ṭha a, semifinal lut turin ITI Veng bakah team ṭha Thenzawl Field Veng a hneh. Nikum Pro Volleyball-a best setter F. Lallianchhungi bakah nikum leh kumin best reciever Esther Hmingthansangi te an kawl a, Valbuanga farnu Lalhriatpuii an la nei cheu.
Coach Lalṭanpuia Varte chuan, "Bungkawn hian keini aiin tawnhriat an nei ṭha a, chutihrualin an kum a upa ve tawh. Straight set-a an chak a nih loh chuan kan chance a ṭha tawh zawk ang," tiin Vanglaini a hrilh.
Bungkawn hi champion lai an ni a, Pro Volleyball club nei an nih avangin an hre chiang ṭha hle. Inelna hnuhnung bera final-a player of the match FP Lalduhkimi, best spiker F. Lalparmawii bakah setter Melody Lallawmkimi (Meme-i), libero Lalremmawii, RK Lalfakmawii, Lalhmingṭani leh Elizabeth Laldinthari te an awm. Player ṭha chho tura ngaih Chinglunkimi an neih belh bawk.
Setter Meme-i chuan, "Kanan aiin kan ṭha bik lo a, kan intluk tawk khawp ang," tiin Vanglaini a hrilh. Bungkawn hian semifinal lut turin Khawzawl Kawnzar leh Pro Volley champion thei club nei veng Luangmual an hmachhawn a, set an la hloh lo.