GIG Motors I Day Football : Hmasawnna, lawmna, beiseina leh induh khawp lohna

14th August, 2024

GIG Motors I Day Football 2024-ah semifinal khelh zawh a ni tawh a, final hi August 15, Ningani zan dar 6:30 hian Mizoram Police leh Aizawl FC ten RG Stadium-ah an khel dawn. Police hi pressure sangah an ṭha ṭhin a, I League club tan fiahna tling a ni ang.

Chutihrualin tun ṭumah erawh inelna neih tawh chin thlir kir ta ila, club hrang hrang tan lawmna tur leh insiam ṭhatna lai tur a awm thei ang. First Division club Bethlehem Vengthlangin an match hnuhnung bera SYS FC an hneh avangin chak hmel an hmu a, lawmna tur an nei. Chutihrualin NorthEast United erawh an tlawm fai vek avangin an khelh danah induh khawp lohna a awm ngei a rinawm.

SYS FC

MPL kaithar SYS FC-in I Day Football aiin MPL11 an ngai pawimawh a, inelna neih laiin coach Lalmuankima hoin Lungleiah first team-in MPL atan training an nei daih.

I Day Football hi SYS FC ṭhat leh ṭhat loh tehna a ni thei lo. An reserve team-in an khelh miau avangin NorthEast United ang thoin point khat pawh an hlawh chhuak lo. First Division club BVT hnuaiah an awm.

Lawmna leh Beiseina

MPL club aṭangin Sihphir Venghlun, Chawnpui FC leh FC Bethlehem ten semifinal an inpet kai zo lo a, chutihrualin player enchhin nana a hman avangin an khelh danah lawmna leh beiseina an nei thei ang.

Sihphir Venghlun hian Chanmari FC an chhaih buai thei a, group match tawp ber thlengin semifinal luh beiseina an nei a, game hmuhnawm an khel tel bawk. MPL11-ah an hriam sawt ang.

Chawnpui FC chu MPL ṭantirha an chelh theih Aizawl FC lakah 7-0 in an tlawm nghal a, FC Bethlehem lakah an tlawm bawk. Mahse, NE United 3-1 in an hneh a, Mizoram Police an khin tawk bawk avangin I Day Football an khelh danah an hnual lo ang.

FC Bethehemin MPL11-ah chak hmel an hmu lo a, I Day Football-ah erawh Chawnpui leh NE United an hneh a, hma an sawn. Police an khelh ṭumin hun rei tak hma an hruai a, a tawpah inlehthaltir lo se semifinal an lut thei hial dawn. FCB hian MPL11-ah beiseina thar an nei dawn.

Induh khawp lohna

Chanmari FC leh Ramhlun Athletic ten semifinal an thleng a, final an lut zo ta lo. Ramhlun Athletic tan semifinal thlen phak hi a lawmawm a, chutihrualin goal venhim kawngah hma an sawn thei lo. Danny Lalduhawma hote hian semifinal-ah goal li an chhuah a, goal venhim kawngah induh khawp lohna a awm ang.

I League 3 khel tur Chanmari FC-in I Day Football khelh hnuah Isaac Vanmalsawma leh Vanlalduatsanga te an la lut a, champion tuma inelna hmachhawn an nih avangin an result-ah an lawm dawn lo. Lalsangzuala Hmar hote hian MPL11-ah goal la chhuah lo mah se I Day Football-ah erawh goal ruk ngawt an chhuah a, hun pawimawhah goal khung an harsat bawk.

Hmasawnna

Aizawl FC hian season liam ta khan I Day Football final an lut a, tun season-ah pawh final an lut. Chutihrualin player ṭhahnem tak an inthlak avangin hmasawnna a awm a tih theih a, coach Victor Lalbiakmawia leh assistant coach Lalruatfela ten fak an phu.

I League club hian final lut turin goal 21 an khung a, goal khat chiah an chhuah. Lalbiakdika'n nasa takin hma a sawn a, match li a inlan ṭangin goal sarih a khung. C. Lalhriatpuia pawhin inrintawkna a nei chho a, goal nga a khung tawh.

Mizoram Police pawhin I Day Football aṭangin FC Lalhmunmawia an nei thar a, an tlarhnung a phui phah hle. MPL11 match ngaah Police-in goal 10 an chhuah a, I Day Football-ah match nga tho khel tawhin goal li chauh an chhuah. Lalbiaksanga Colney hote hian semifinal-ah team ṭha Chanmari an hneh a, Aizawl FC pawh an hlau lo ang.