Zubimendi-a'n Liverpool a hnar

Liverpool fan-ten nipui transfer-a player thar an lakluh thu hre turin an nghah leh hret a ngai dawn - Real Sociedad midfielder Martin Zubimendi chuan Reds sawmna hnarin, Spanish club-a cham a thlang zawk a, Anfield a pan leh dawn lo.

Kum 25 mi Zubimendi hi Euro 2024 khelh zawh taka champion Spain team-ah a tel a, Rodri thachhang dawltu niin, final-a Rodri a inhliam khan bench aṭangin a lut - a khel ṭha takzet.

Liverpool hi Zubimendi lak theih a nih thu hrilh an ni a, number 6 player mamawh Reds hian Spanish midfielder lam hi an hawi vat. Mahse, la lut thei mai tura an inngaih laiin, Sociedad lamin an player hi an hnena cham turin an thlem a, amah siam liantu club-a cham chhunzawm a thlang leh ta zawk.

Real Sociedad aṭanga inzir chhuak Zubimendi hian Sociedad tan match 188 khel tawhin, goal riat a khung a, assist vawi sarih a nei bawk. Kum 2020 khan Copa del Rey nomawi a chawi a, hemi tih loh club tan nomawi chawi a la nei lo.

Spain tan vawi 10 inlan tawhin, UEFA Nations League leh Euro nomawi a chawipui tawh a, kum 2020 khan Olympic silver medal a la bawk. Season hmasa khan Arsenal leh Barcelona pawhin an lo rim tawh a, mahse, a hmangaih a club hi a chhuahsan phal lo a ni ber.

Liverpool hian euro maktaduai 60 man player an lak theih tak lohah chuan khawdang an hawi a ṭul dawn a, hetihrual hian khawthlang media ṭhenkhat chuan tun nipui transfer-a player la la lut miah lo Liverpool hian midfielder chu an melh tawh dawn lo niin an sawi.

Arne Slot enkawlna hnuaia season thar hmachhawn tur Reds hian tun dinhmunah number 6-a khel thei hi Alexis Mac Allister, Ryan Gravenberch, Curtis Jones, Dominic Szoboszlai, Trent Alexander-Arnold leh Wataru Endo an nei a ni.