Paris Olympic 2024 : India dinhmun dik tak chu!

Khawvela mihring tamna ber - mi tluk leh dingawn 1.45 chuang awmna India hi infiamna khawvelah eng ang taka ropui nge a nih chu fiahin a awm a, ram hmasawn leh changkang an tehna pakhat Olympic aṭanga tehin India dinhmun a ṭha tawk em tih chu chhut tham a tling.

Paris Olympic neih zawh takah khan India hian medal paruk a la. Neeraj Chopra-a'n mipa fei khawh (Javelin Throw) huangah silver medal a la, medal dang panga chu bronze vek a ni thung a, pakhatna nihna India hian a nei lo.

Brazilian thu ziak mi Paulo Coelho chuan, "Mihringte hian lungawina kim kan nei lo, thil nei tlemin neih belh an châk a, a nei tam pawhin a aia tam lehzual an duh belh," tiin a lo sawi tawh a, hei hi India mipuite rilru pawh a nih ngei a rinawm.

India dinhmun

India tan hian Manu Bhaker chu kawng rawn hawng ṭantu a ni a, Indian hmeichhe zinga shooting huangah Olympic medal la thei hmasa ber ni turin 10m air pistol-ah pathumna a ni.

Kum 22 mi Bhaker hian a la duhtawk mai lo - mixed team 10m air pistol huangah Sarabjot Singh nen bronze medal an la bawk - India infiammi zingah Haryana nula hi Olympic vawi khata medal pahnih la thei hmasa a ni hial.

Bhaker-i vang hian Paris Olympic hi India tana mellung pawimawh a ni a, hun chhinchhiah tlak a ni bawk. Chutihrualin, infiamna peng dangah erawh hmasawnna leh thil ropui thleng thar a awm hran lo.

Mipa javelin hi Olympic hnuhnung zawka Neeraj Chopra-a'n gold medal a lak tawhna kha a ni a, tun ṭumah chuan pahnihna a ni. Mipa hockey team pawh an champion fo tawhna ni mah se bronze medal-ah an lungawi a ngai.

Wrestling hi India medal lakna ṭhin a ni a, kuminah pawh medal a la leh bawk. Aman Sehrawat-a'n bronze medal a la, wrestler dang Vinesh Phogat chu silver emaw gold medal emaw dawn thei dinhmunah ding hman mah se, a rih tur zat bituk aia a lo rih avangin paih chhuah a ni.

Vinesh-i leh a team te chu infiamna lama thubuai ngaihtuahtu sang ber - Court of Arbitration for Sport (CAS) hnenah an zualko. Olympic zo tawh mah se a thubuai hi a la zo lo, a nghaihtuah leh thutlukna puan hun tur pawh sawnsak a ni fo.

CAS chuan thutlukna a la siam thei mai lo a, ruahman dan chuan nizan khan ngaihtuah fel tura tih a ni. Mahse, a hun an sawnsak fo avangin a dinhmun hi an puansak hman ang em tih erawh hriat a ni thei rih chuang lo a ni.

Chhetri-a ngaihdan

Mihring awm zat, ram len leh infiamna atana sum hman ral dan chhut chuan India rama Olympic medal a lak zat hi a tam lo tiin a sawi theih. Eng hi nge a chhan ber ni ang tih erawh mawhpuh ber tur hriat a harsa.

India football captain hlui Sunil Chhetri chuan, "Mipui hetiang zat hi kan awm a, mihring zat aṭanga kan chhut phei chuan India ramin Olympic medal a lak zat hi a inhmeh lo takzet.

"Medal kan lak tlem chhan hi awlsam taka sawi theih a ni, a chhan lian tak chu infiammi te hian a hunah tak training ṭha an dawng lo a, an mamawh ang enkawlna an hmu lo tih a lang bawk.

"USA, China, Japan, Germany, Australia leh Canada te hi en ila, kan ram nen chuan kan inkar a zau hle. Anni chuan a hunah tak an infiammite an chawm a, an mamawh an pe - hei hi an hlawhtlin chhan niin a lang," a ti.

Khawvel huapa hlawhtling tur chuan thawk leh khata tih thut te, training neih thut te, ei tur ṭha ei thut te hian awmzia a nei thui lo niin a lang, naupang thil zir lai leh hmasawn thei an nih lai aṭanga an kalna tur kawng ngaihtuahsak a ngai niin a lang.

Medal 41

India hian kum 1900 Paris Olympic aṭang khan infiamna khawmpui lian hi a lo hmachhawn ṭan tawh a, kuminah hian a bul ṭanna France khawpuiah bawk a kir leh - Olympic medal a lak tawh zawng zawng belhkhawm chu 41 chauh a la ni!

Paris 2024 bik chauh thlir ila, pakhatna United States of America leh pahnihna China te chuan gold medal chauh pawh 40 an la tling, a pumpuiah US hian medal 126 a la. Pathumna Japan pawhin medal 45 a la tling hial.

Japan ramin Olympic vawi khata medal a lak zat 45 hi India ramin Olympic a hmachhawn tawh zawng zawnga medal a lak zat (41) aiin a tam zawk tihna a ni a, kuminah hian India hi 71-na a nih avangin a chunga awmte chu chhiar fe tham an ni.

Paris Olympic-ah hian ram hrang hrang 62 zetin gold medal an la thei a, heng zingah hian Pakistan pawh an tel. Africa chhim lama ram pakhat, mihring nuaih 25 pawh awm tlin lohna Botswana pawhin gold medal an la thei hial.

India hian gold medal a beiseina sang ber chu Neeraj Chopra tiin a sawi ngam. Neeraj hian qualifying lamah chuah a khawh thui ber, mahse inelna takah Pakistan tlangval Arshad Nadeem chuan Olympic record siamin gold medal a chhuhsak a ni.

Haryana rah chhuah

India ram zau zawng aṭanga teh chuan Haryana hi 1.4% chauh a ni a, mahse he hmun aṭang hian India tana Olympic medal la thei tam zawk chu an rawn chawr chhuak ta si - India chhandamtu tih pawhin a sawi theih ang.

Paris Olympic medal latu - India infiammi zingah Swapnil Kusale (Maharashtra) tih loh midang kha chu Haryana chhuak an ni a, medal pakhat erawh mipa hockey team niin state hrang hrang aṭanga koh khawm an ni.

Haryana hian kum 2015 khan Sports Policy a duang chhuak a, kha tih laia an chief minister Manohar Lal chuan, "Haryana hi India rama sports hmunpuiah kan siam dawn," a ti a, tunah chuan an hmathlir thui leh ṭha tak chu India mawina a ni ta.

Infiammi naupang zawn chhuah kawngah tha an thawh nasa a, an chher zui bawk. Infiammi chauh an tawk lo a, coach leh trainer ṭha bakah a hlawhtlingte chawimawina lam an uar bawk - heng bakah hian referee, judge leh umpire thlengin an chher.

State chhungah inelna changtlung tak buatsaih ṭhin a ni a, hei hian infiammite zingah inelna hmachhawn dan a zirtir. State pakhat tan infiamna zawng zawng thlurbing theih a ni lo ang, mahni tih awm chi zir thiam a pawimawh hle dawn a ni.