Alvarez-a'n Atletico a zawm ta
Atletico Madrid chuan Manchester City striker Julian Alvarez an la lut fel ta a, world champion striker manah hian pound maktaduai 81.5 an inseng - a man hi vawi khata pek tlak nghal vek tur erawh a ni lo.
Spanish club hian £64.4mtd chu City hi an pe phawt ang a, a khelh ṭhat dan a zirin £17.1mtd chu pek belh leh tur a ni dawn - Argentine striker hi City-in player an hralh man to ber a ni nghal a, kum 2022-a Chelsea-in Raheem Sterling mana £50mtd an pek chu a khum.
Kum 24 mi Alvarez hian kum ruk chhung Atletico-a khel turin contract a ziak a, amah ang thoa Argentine mi Diego Simeone enkawlna hnuaiah a khel dawn - La Liga tingaihnawm zualtu zingah a tel nghal.
Mangṭha City
Alvarez hian January 2022 khan River Plate aṭangin City hi £14.1mtd-in a zawm a, kum chanve dang chu Argentine club-ah hian loan-in a khel leh phawt. 2022-23 season aṭangin City tan a khel ṭan a, nomawi paruk a chawi hman.
Argentina tana World Cup leh Copa America champion tawh Alvarez hi City-a a season hmasa berah treble champion a ni a, season hman zawh takah khan Premier League champion niin, UEFA Super Cup leh Club World Cup-ah an champion bawk.
Alvarez chuan, "Lungleng tak chungin he club ropui tak hi ka thlah ta a, he hmunah hian kum hnih chhung hun duhawm tak ka hmang a ni. Hetih chhung zawng hian player ka nihna piahlamah, mihring mihrinnaah pawh hma ka sawn phah hle," a ti.
Mangṭha Alvarez
Argentina tan vawi 36 inlana goal kua khungtu Alvarez hian City tan season hnih chhungin match 103 a khel hman a, goal 36 khungsakin, assist vawi 18 a nei - City-a Erling Haaland thachhang dawltu nih reng ai chuan hmun chang tam tura Atletico pan a thlang.
City director of football Txiki Begiristain chuan, "He club tana a khelh chhunga a nomawi chawi zat hian a nihphung dik tak chu a hrilhfiah ber a, ani hi chu nomawi chawi ṭhin striker a ni e.
"A hma hun kal zel tur atan duhsakna ka hlan," tiin an striker chu a thlah liam ve bawk - Atletico Madrid hian August 19 zan dar 1:00-ah Villarreal lenchilhin, season bul an ṭan dawn a, fan-ten Alvarez hmel hmuh nghal an beisei ang.