Djokovic a chak tluang zel

Mipa tennis world number 1 Novak Djokovic chuan season duhawm a hmang chhunzawm. Serbian tlangval hian kuminah match 21 khel tawhin hnehna a la chang vek, chak loh a la nei miah lo!

Nimin zing khan Djokovic hian a khingpui Jan-Lennard Struff lakah 6-3, 6-1 in hnehna a chang a, nuamsa takin Western and Southern Open khelh laiah semifinal a lut. Kum 33 mi Djokovic hian German tlangval hneh tur hian darkar khat leh minute hnih bak a mamawh lo. Tournament tir lamah nghawng na vangin buai deuh mah se a dam chiang tawh, a service kawngah pawh harsatna a nei tawh lo a ni.

Djokovic chuan, "Game hnuhnung ber kan khelh thleng khan harsatna ka nei lo, a bik takin service ka nei ṭha leh ta kha ka lawm, service a ṭhat hi chuan point hmuh a awlsam phah ṭhin," a ti. Semifinal-ah chuan Roberto Bautista Agut a hmachhawn leh ang.

Inkhel dangah seeded pariatna Bautista Agut hian champion tura rinkai zinga mi leh nomawi kawl mektu ni bawk Daniil Medvedev a hneh. Seeded pathumna Medvedev hian inelna tur lamah khel ṭha viau mah se quarterfinal-ah hian a talbuai, 1-6, 6-4, 6-3 in a chak lo. August 31 aṭang hian kumin chhunga Grand Slam pahnihna tur US Open an khel dawn a, tun tournament khel laia player ngaite bawk hi inlan tur an nih dawn avangin chet ṭhat a pawimawh hle.