Inter Milan tana rinawm Martinez

Lautaro Martinez chuan Inter Milan tan a rinawmna lantir nan contract a ziak thar a, kum 2029 thleng atan Serie A champion nen hian an inrem a ni.

Italian champion chuan thuchhuah siamin, "FC Internazionale Milano leh Lautaro Martinez te chu kan inrem. Kum 1997-a piang striker hian June 30, 2029 thleng cham turin contract a ziak," an ti.

Argentina international striker Martinez hi tunlai player hmuhnawm leh hlauhawm zinga mi a ni a, European club lian dangte pawhin an hel rawn a ni - tunah erawh a hma hun tur chu a chiang.

Thla hmasa mai khan Inter president Giuseppe Marotta chuan Lautaro chu inremna an neihpui tawh tih a sawi a, nipui chawlh laia Copa America champion an nih khan thil a chiang tawh niin a lo sawi tawh a ni.

Kum 26 mi Martinez hian season hmasa khan league goal 24 khungin Inter Milan chu Serie A champion a nihpui a, an ram Argentina chu Copa America champion a nih pui bawk, an champion theihna goal a khung.

Chanchinbu miten an tarlan dan chuan Martinez hian a contract tharah hian, kum khatah euro maktaduai 9.8 a hlawh a, tunah hian chawlh hmang zoin Inter tan season bul a ṭan thei ang.

Serie A champion hian an coach Simone Inzaghi pawh contract thar an ziahpui tawh a, striker Martinez hma hian midfielder Nicolo Barella pawh kum 2029 thleng atan an lo thlung nghet tawh bawk.

Tun kar tawp Inrinni zan hian Serie A bul an ṭan dawn a, an match hmasa ber atan Genoa an hmachhawn ang.