Number 1 ni chunga kum tawp khar duh Alcaraz

Carlos Alcaraz chuan kumin a thil tum zinga pakhat a sawi chhuak a, world number 1 ni chung ngeia season tawp khar a duh tih a sawi - chumi hlen chhuak tur chuan hma lak ngei pawh a tum.

Spanish star Alcaraz hian kuminah French Open leh Wimbledon title a la, infiamna khawmpui lian Paris Olympic 2024 neih zawh takah champion chiah lo mah se silver medal a hlawh chhuak bawk.

Tunah chuan US Open khel turin a inbuatsaih dawn, hard court inelna Cincinnati Open a khel dawn a ni. Alcaraz chuan, "Season hmasa khan he hmunah hian final ka lo thleng tawh, kuminah nikum aia ṭha zawkin chet ka tum.

"Player tinin thil tum kan nei, champion bakah number 1 nih ka duh. A chung bera awm ngeia kum tawp hman ka tum dawn a ni," tiin a sawi a, Cincinnati Open bakah US Open khelh ṭhat a ngai dawn.

Alcaraz hian tun dinhmunah world number 1 Jannik Sinner chu point 450-in a phak lo mek a, tournament pakhat lekah pawh an dinhmun hi inthlak thei a la ni. Italian star Sinner tan inthlahdah a thiang bik lo.

US Open inbuatsaihna pakhat Cincinnati Open aṭang hian Novak Djokovic erawh a inhnukdawk thung. Serbian star hian Olympic gold medal a vaw chhuak tawh a, tennis khawvelah chuan a thlen tur chin a thleng chhuak tawhah a ngai a ni.