Magpies-in Palace defender Guehi an duh

Newcastle United-in Crystal Palace centre back Marc Guehi chu khawdang an hawisan thei lo - a vawi thum nan England international hi lakluh tumin Palace an dawr a, an hlawhtling kher ang em, sawi theih erawh a ni lo.

Magpies hian kum 24 mi defender manah hian pound maktaduai 60 an phal a, £55mtd pek phawt a, a khelh ṭhat dan a zira £5mtd pek belh turin an dawr. Hetihlai hian Palace-in an defender man atana an beisei zat erawh £70mtd daih a ni thung.

Hetihrual hian Guehi hian Eagles-ah kum hnih bak contract a nei tawh lo a, Magpies dawrna hi an hnar a nih chuan season tharah man tlawm zawka a chhuah theihna chance a sang - Palace lam pawh an inngaihtuah buai viauin a rinawm.

England tana vawi 17 inlan tawh Guehi hi Chelsea academy aṭanga inzir chhuak niin, kum 2021 khan Palace hi a zawm a, English club tan hian match 111-ah goal nga khungin, assist vawi hnih a nei.

Palace hian Fulham-in £20mtd-a an centre back Joachim Andersen lakluh an dilna chu an hnar bawk a, London Chhim Veng club hian Denmark international Andersen hi £40mtd aia tlawma hralh an tum lo.