England-a kir duh Zaha

Wilfried Zaha chuan season khat chiah Galatasaray-a hun a hman hnuah Turkish Super Lig club hi chhuahsan a duh niin khawthlang media-te chuan an tarlang a, a club hlui Crystal Palace chuan loan-a lak kir dan an ngaihtuah mek.

Kum 31 mi forward hian 2022-23 season khan Palace-ah a contract hmang zoin, Champions League khelh a duh avangin Galatasaray a zawm. Turkish club tan match 42-ah goal 10 khungin assist vawi nga a nei a, mahse, chhuah a duh.

Zaha hian Palace tan vawi 458 lo khel tawhin, goal 90 a khung bakah, assist vawi 62 a nei a, London club-ah hian a kir a nih chuan a tlangnel lehnghal dawn - hei tak hi Palace pawhin loan-a lakkir an duh chhan niin a lang.

Mahse, vawi hnih ngawt Palace lo chhuahsan tawhtu hi West Ham leh Leicester City pawhin an duh nia sawi a ni a, Galatasaray-ah kum 2026 thleng khel turin contract a nei mek.

Galatasaray hian kar hmass khan an league match hmasa berah Hatayspor chu 2-1 in an hneh a, he inkhelah hian Zaha chu squad-ah pawh a awm tawh lo.