UAE-ah Zouma a kal leh dawn lo

West Ham captain Kurt Zouma chu United Arab Emirates club Shabab Al-Ahli zawm tura an inbiakfel vek hnuah medical a paltlang lo a, kum 29 mi defender hi UAE-ah a khel leh dawn lo.

Zouma hian Hammers-ah kum khat contract la nei mah se, Premier League club hian an mamawh tawh loh avangin chhuah an phalsak a, mahse, Dubai hial thleng tawh mah se, UAE club chu a zawm leh thei dawn ta lo a ni.

Hetiang a nih takah chuan Zouma aiawhte chuan an player khelhna tur hi an dap lehnghal a ngai dawn a, West Ham-ah cham ta se, hmun a chan a rinawm tawh lo. Hammers hian centre back Jean-Clair Todibo chu Nice aṭangin loan-in an la tawh a, season tawpah euro maktaduai 40-a leina tur an ziak tel.

Todibo bakah hian Wolverhampton Wanderers captain leh centre back ni bawk Max Kilman chu £40mtd-in an la tawh bawk a, Zouma tan cham loh a finthlak zawk - Zouma hian kar khatah £125,000 a hlawh nia sawi a ni a, coach thar Julen Lopetegui hnuaia insiamrem tum mek Hammers hian a chhuah an duh zawk.

Zouma hian kum 2021 khan Chelsea aṭangin Hammers hi pound maktaduai 29-in a zawm a, season hmasa ṭan dawna Declan Rice-a'n Arsenal a zawm khan coach David Moyes chuan club captain-ah a ruat zui.

Mahse, captain ni chungin season khat chiah hun a hmang hman. French defender hian Hammers tan inelna hrang hrangah match 103 khel hmanin goal ruk a khung a, assist vawi khat neiin, 2022-23 season khan Europa Conference League-ah a champion pui.