Tu nge Jacob Blake chu?

August 23 khan Jacob Blake hi Kenosha, Wisconsin-ah Police-ten an kap a, video aṭanga a lan danin Police-te hian vawi sarih ngawt silai an hmet puak. 

Kenosha police-te chuan phone call an dawn anga Blake-a awmna hi thleng an nih thu an sawi a, phone-a be tu hian Blake chu a awm lohna tura a awm thu leh an chahbi a chhuhsak chu a pek let duh loh thu a sawi. 

Hetihlai hian mita hmu tu pakhat chuan Blake hian kawng sira hmeichhe paruk/pasarih vel inhaubuai awmna sirah a car-a tih din thu a sawi a, engmah a sawi lo niin a sawi bawk. Blake-a ukil Benjamin Crump chuan Blake hian hmeichhe insual buaite hi ṭhelh a tum thu a sawi a, car chhunga a fate pathum en tura a lut chu Police hian an kap ta a ni. 

Video-ah pawh Blake hian driver seat lam aṭangin a car kawngkhar a hawng tih a lang a, a seat hnung lamah hian a fapa pathumte chu an ṭhu a ni. Police-te chuan Blake-a car-ah hian chemte an hmuh thu an sawi. Jacob Blake-a chhungte chuan Blake hi a dam chhuak leh a nih pawhin a kal theih tawh loh tur thu an sawi a, he buaina chhuitu Wisconsin department of justice chuan Police officer-te chu chawlh pek mek an nih thu leh an thil hmuhchhuahte chu court hmaah an phochhuah tur thu an sawi.