Liverpool-in goal ropui pahnih an chakpui

Premier League champion lai Manchester City an tlawm. 2-1 a City hnehtu Liverpool tan season thara Champions League khelh beiseina a nung chhunzawm zel.

Anfield-a inkhelah Liverpool tan Jordan Henderson leh Philippe Coutinho te'n box pawn aṭangin goal ropui an khung a. City tan Edin Dzeko chuan tun season Premier League-a a goal lina a khung bawk.

City hian Liverpool an hmachhawn hmain box pawn aṭangin goal an chhuah ngai lo a, Reds midfielder ball pet thiam te'n an record duhawm tak hi an tihtawp sak.

Inkhel chu

Liverpool tan inhliam vangin captain Steven Gerrard hmuh tur a awm lo a, Daniel Sturridge chu bench-ah a ṭhu bawk. Liverpool tlar hmaah Coutinho, Raheem Sterling leh Adam Lallana te an rawn ding a, City tan Sergio Aguero leh Dzeko te an inkawp bawk.

Team pahnih an inhlau lo tawn a, an innawr tawn zak zak. Goal khung hmasa zawk erawh Liverpool an ni. Sterling chuan Henderson ball a pe phei a, kum 24-a upa Gerrard awm loh vanga captain hian yard 20 vela hla aṭangin mawi em em in goal sirah tak a hlai lut.

Anfield-ah thawm a ṭha a, goal luh theih chhan hi City tana game 200-na kheltu captain Vincent Kompany tihsual vang a ni.

City-in theihtawp chhuahin an nawr let a, Aguero a hlauhawm theih hle. Minute 25-naah City-in an si phurh an rawn chhang let ta nge nge a, Aguero thawhrah sengin Edin Dzeko chuan Premier League-a a goal 50 na a khung a, Anfield-a kop au thawm a reh.

Liverpool-in chawlhlawk hmain chance ṭha hmu leh mahse, Lallana chuan Lazar Markovic a ball cross ṭha tak chu a lo pet out hlauh. Goal dang luh belh tawh loin chawlhlawk an hmang.

Coutinho goal ropui

Second-half an khel a, team pahnihin chak zawk nih ngei tumin an in nawr tawn. City tan Aguero chuan chance duhawm tak a hlah a, hemi hnu lawk hian Sterling chuan a chance neih ṭhat goal-ah a chan tir thei bik lo.

Turkey a zin chau hlim Liverpool player-te an chau niin a lang. Mahse, zin ve lo Coutinho a awm a, kar liamta a Southampton an hneh ṭuma goal ropui khungtu hian kha goal kha vanneih vanga khung a ni lo tih a lan tir a, yard 25 vela hla aṭangin goal ropui em em a khung a, City keeper Joe Hart tan dan rual a ni lo.

Liverpool hian minute 76-na a rawn tlan lut Daniel Sturridge hmangin chance ṭha tak nei leh mah se, goal khung belh loin 2-1 in an ṭin ta a ni.

Inkhel chhehvel

Liverpool tan Kolo Toure chu minute 83-ah a rawn tlan lut a, Alberto Moreno a rawn thlak. He inkhelah hian City tan Yaya Toure a khelh ve tho avangin 'Toure' unau competitive match-a an intum hmasakna ber a ni.

Liverpool-in kum 2015-a an Premier League record duhawm tak an chhawm nung zel a, hneh loh pakhatmah an la nei lo a ni. Liverpool hian point 30 hlawhchhuah theihna inkhel aṭangin point 26 an hlawhchhuak.

Eng nge an sawi?

Liverpool manager Brendan Rodgers chuan, "Ka player-te khan fak an phu a ni. Turkey aṭangin Zirtawpni khan kan rawn thleng chauh a, khati khawpa ṭha khan kan khel leh thei a ni. November aṭang tawh a kan khelh dan enin kan khel ṭha em em a, top four-ah kan inhlangkai thei a nih phawt chuan nikum ai khan kan khel ṭha zawkah ka ngai ang. Mahse, tunah chuan kan game khelh leh tur atan kan inbuatsaih a kan insawrbing a ngai leh tawh a ni," tiin an hmachhawn leh tur Burnley lamah rilru an pek a ngaih tawh thu a sawi.

Liverpool boss chuan goal ropui khungtu Coutinho fakin, "Kum 19 mi lek nichungin kan hnenah a rawn kal a ni tih miin an theihnghilh leh ṭhin. Tunah hian kum 22 mi chauh a la ni a, tunah hian hmasawn zawnga kalin a khel hi a hmuhnawm thei em em a ni. Chu chu a goal ropui tak tak hian a ti lang chiangin ka hria," a ti.

Manchester City manager Manuel Pellegrini chuan, "Chelsea aiin khelh khata khel tam chungin point thum lai kan hloh a, tunah chuan kan tan hmahruaitu nih hi a harsa tawh dawn a ni. Mahse, theihtawpin kan game pangngaia let leh tumin kan thawk anga, kan thlen chin chu a la hriat mai ang chu. Liverpool nen khan kan inhnehtawk em em a, goal hnih mawi tak an khung kha an chakpui ta a ni," tiin chak loh chhuanlam a siam lo.