Ka thutlukna ka thlakna chhan tur a awm lo - Joachim Low, Germany Coach

Germany coach Joachim Low-a'n UEFA Nations League-a Germany squad tur a puang a, Bayern Munich treble champion puitu Thomas Muller leh Jerome Boateng-te chunga a rilru put dan a la thlak loh thu a sawi.

Low chuan, "World Cup zawh khan an tel loa team din turin thutlukna kan siam a, an insiamṭhat theihna turin hun leh hmun kan pe," tiin an thutlukna ngaiah a la din thu a sawi.

Germany hi World Cup 2018 khan group stage-ah Sweden, Mexico leh South Korea te nen an awm a, table mawngphahah awmin group stage an paltlang lo.

Inelna neih zawh hnuah Low-a'n khawvel mak tih thutlukna a siam a, Muller leh Boateng bakah Mats Hummels te chu ram tana a koh loh tur thu a puang. Germany boss hian ṭan chhan ṭha tak neiah inngai mah se a player hnawl hnute hi an club tan an che ṭha chhunzawm zel. Kum 30 mi Muller hi  season liam ta khan Bayern tan match 50-ah a inlan a, Champions League, Bundesliga leh DFB Pokal-a an champion theih nan player pawimawh a ni. Muller hian goal 14 a khung a, a goal khung aia pawimawh erawh team tana a thawhhlawkna hi a ni. Bundesliga-ah assist vawi 21 neiin record thar a siam hial.

Kum 31 mi Jerome Boateng pawh Champions League final-ah bul a la ṭan thei a, tun season-ah inhliamin a tlak buak chungin match 39-ah a inlan. German defender hi Bayern boss Hansi Flick-a'n hun pawimawhah a la ring ngam a, Low erawhin a ngaihdan sawh sawn a tum lo.

Germany hian UEFA Nations League-ah September 4 leh 6 hian Spain leh Switzerland an hmachhawn dawn. Low hian Champions League champion Bayern player pali Manuel Neuer, Joshua Kimmich, Serge Gnabry leh Leon Goretzka te a awltir a, chutihrualin match khel tam lo Bavarians defender Niklas Sule a ko thung.

Bayern player bakah hian UCL semifinalist player Marcel Halstenberg leh Lukas Klostermann-te chu awltir an ni. Joachim Low hian player a ko naupang hle. Real Madrid midfielder kum 30 mi Toni Kroos chu a upa ber a, ani bakah hian Manchester City keeper Ilkay Gundogan chu outfield player zinga kum 26 pel awmchhun a ni. Manchester City aṭanga Bayern zawmtu Leroy Sane a tel a; Hoffenheim keeper Oliver Baumann, Atalanta defender Robin Gosens leh Borussia Monchengladbach midfielder Florian Neuhaus te chu a vawi khat nan koh an ni.

German Squad

Goalkeepers: Kevin Trapp (Eintracht Frankfurt), Bernd Leno (Arsenal), Oliver Baumann (Hoffenheim)

Defenders: Thilo Kehrer (Paris Saint-Germain), Robin Gosens (Atalanta), Matthias Ginter (Borussia Mönchengladbach), Jonathan Tah (Bayer Leverkusen), Nico Schulz (Borussia Dortmund), Niklas Süle (Bayern Munich), Antonio Rüdiger (Chelsea), Robin Koch (Freiburg)

Midfielders: Florian Neuhaus (Borussia Mönchengladbach), Julian Draxler (Paris Saint-Germain), Toni Kroos (Real Madrid), Julian Brandt (Borussia Dortmund), Kai Havertz (Bayer Leverkusen), Suat Serdar (Schalke), Ilkay Gündogan (Manchester City), Emre Can (Borussia Dortmund)

Forwards: Timo Werner (Chelsea), Luca Waldschmidt (Benfica), Leroy Sane (Bayern Munich)