GIG Motors I Day Football Final : Zanin dar 6:30-ah Mizoram Police Vs Aizawl FC

Tualchhung football ngainatute tan hun duhawm a inher chhuak leh ta. Zanin dar 6:30 hian GIG Motors I Day Football final-ah Mizoram Police leh Aizawl FC te RG Stadium-ah an inkhel dawn a, hmaih phal chi a ni lo.

I League club Aizawl FC hi champion tura rinkai ni mah se Covid-19 hnuah an la champion leh lo a, Mizoram Police erawhin hri len hnuah I Day Football leh MPL nomawi an chawi leh tawh a, boruak sang an ngam bawk.

AFC an inpeih

Aizawl FC-in nikum I Day Football final an thleng a, nomawi inchuhnaah an vanduai. Kuminah AFC hi vanduai nawn thei ni mah se group stage mai ni lo, MPL11 an khelh dan aṭanga thlirin chesual thei lo ang mai an ni.

I League club hian MPL ṭan hma an vanneihpui a, tun season match hmasa bera Chawnpui FC nen an inhnehtawk hnu khan hma an sawn chho char char. MPL11-ah match nga khelin vawi thum an chak a, chak loh an nei lo - goal 14 khungin goal nga an chhuah.

I Day Football-ah an insiamṭha lehzual a, match ngaah vawi nga chak vekin goal 21 an khung a, goal khat chauh an chhuah. Coach Victor Lalbiakmawia'n player-te a hrechiang tawh a, tun season bikah chuan thutlukna a ṭha ṭhin hle.

Champhai Zotlang tlangval Lalbiakdika'n MPL11-a goal nga a khung hnuah I Day Football-a a inlan zawng zawngah goal khung vekin goal sarih ngawt a khung. Samuel Lalmuanpuia'n Aizawl FC game-ah danglamna a thlen a, game siamtu ber niin semifinal-ah goal pawimawh bik a khung.

Aizawl FC player 11 aia tam an che ṭha a, an striker C. Lalhriatpuia'n I Day Football-ah goal nga a khung tawh a, player 10 zetin goal an khung tawh. Goal khung lo lamah Lalthankhuma (TK-a), Lalmuanpuia leh captain Lalchhawnkima te an che ṭha a, nomawi an chawi lo a nih chuan an la na ve khawp ang.

Police nge nge

Mizoram Police erawh team danglam daih an ni a, pressure sang khel tura duan an ni thung. MPL10 final-ah team ṭha zawka ngaih Chanmari an hneh a, MPL11-ah Chanmari lakah an tlawm.

Mahse, hemi zawh hian Malsawmfela chuan, "A pawimawh hun takah kan hneh leh ang che u," tiin Chanmari captain Lalrinchhana Tochawng a hrilh a, a dikna chu I Day Football semifinal-ah hmuhin a awm a, Sawmfela'n goal hnih a khung.

Police hian I Day Football hmaa MPL11 match hnuhnung berah Aizawl FC 4-1 in an hneh lo a, group stage-ah 2-0 in an tlawm nawn. Lalbiaksanga Colney hote hi an vawi thum inhmachhawnnaah tho chhuah an tum ang.

Police player tam zawk hi an kum a upa tawh a, tun hma angin an fitness a ṭha tawk lo. Mahse, final erawh zanah khelh a ni dawn a, Police player-ten thahrui an ngah phah ang. Tawnhriat player karah talent nei ṭha Michael Lalbiaksanga te an tla zep a, Tlangmawi midfielder hi team tan a ṭangkai ṭhin.

Tlarhnungah Santosh Trophy final round-a Mizoram tana inkawp Lalhmunmawia (Ahmuntea) leh FC Lalhmunmawia (FC-a) te an inkawp thei a, centre back nei ṭha ber an ni zawk. Goalkeeper-ah Mizoram keeper F. Lalmuanawma a awm a, semifinal-ah Muanawma hi inlan thei lo mah se final erawh a inlan a beiseiawm. Penalty shootout an thleng a nih chuan Muanawma hi danglamna thlen thei a ni ang.