LBS Suzuki CYMA Volleyball semifinal : Hunthar Vs Chhinga Veng; Muanna Veng Vs Khawhai

CYMA leh Mizoram Volleyball Association (MVA) buatsaih LBS Suzuki 23rd Inter Branch YMA Volleyball Tournament 2024 mipa semifinal chu vawiin chhun dar 12:00 hian R. Dengṭhuama Hall, Mualpuiah khelh a ni dawn. Match hmasa zawkah champion lai Hunthar leh Chhinga Veng an inkhel ang a, match hnuhnung zawkah Muanna Veng leh Khawhai an inkhel thung ang.

Vawi thum champion tawh Hunthar hi champion lai ni mah se tun ṭumah hian kum 2018 champion Muanna Veng hi nomawi chawi tura rinkai an ni a, an khingpui tur Khawhai an ṭha bawk. An khelh tawhna chin aṭanga thlir chuan inkhel hnuhnung zawk hi hmuhnawm tur zawka ngaih a ni.

In cho ve ve

Hunthar hian semifinal lut tur hian Bungkawn (3-0), Hlimen (3-0), Sihphir (3-0) leh Khawbel (3-0) te an hmachhawn a, straight set vekin an hneh. Quaterfinal-ah champion beisei ngam Khawbel straight set-a an hneh hian inrintawkna nasa zawk a pe ang.

Chhinga Veng hian Chungtlang (3-1), Chanmari West (3-2), Nursery Veng (3-1) leh Tuikual North (3-1) in an hneh a, straight set-a chak an la nei lo. Chutihrualin Chhinga Veng coach Lalbiakmuana (Sena) chuan, "Kan squad chu a chhah tawk lo mai thei a, mahse chakpui thei tur player kan nei a, cho bik emaw hlauh emaw kan nei lo," tiin Vanglaini a hrilh.

Coach Sena'n Mizo player ṭha Lalbiakmuana leh PVL best player ni lai Fabian Lallunghnema bakah Lalchungnunga, setter Lalnuntluanga leh libero Lalhmingsanga te a neih miau avangin a inringtawk hi a awm lo hran lo.

Hunthar lamin Chhinga Veng an hlau bik lo a, coach Lalthanzuala (TZ-a) chuan, "Semifinal chinah hi chuan an ṭha vek tawh a, chutihrualin Chhinga Veng hi tum châkawm ber an nihna lai a awm thei ang. Biakmuana leh Fabian te ven uluk a pawimawh dawn a ni," tiin Vanglaini a hrilh.

Hunthar hi CYMA champion lai an ni ngawt lo a, PVL hnuhnung berah pawh an champion. Mahse, tun ṭumah hian an champion ṭuma best setter C. Laldawngkima a tel tawh lo a, a aiah kum naupang zawk Lalremmawia chungah rinna an nghat.

TZ-a chuan, "PVL champion lai kan ni chungin PVL aṭanga kan inhnuhdawhna chhan chu player naupang zawk chher kan duh vang a ni a, second division-ah kan inziaklut dawn. Chutihrualin kan duh ber chu champion a ni," tiin a sawi.

Tun ṭumah hian an champion ṭuma final-a player of the match Remsangzuala (Lalmama) chu player pawimawh a ni a; Lalrinngheta leh Lalhruaizela an pawimawh bawk. Semifinal-ah inhliam vanga Khawbel hmachhawn thei lo middle player Lallawmkima (Valpuia) a dam chuan final lut turin an dinhmun a ṭha ang.

Valbuanga te inlan hun

Muanna Veng leh Khawhai inkhel tur hi final tluk zeta hmuhnawm tura ngaih a ni a, a chhan chu Muanna Veng hi Valbuanga awmna niin Khawhai hi CYMA Volleyball finalist ni lai an nih bakah 2023 Inter Village Volleyball champion an ni.

Khawhai hian an player ṭha Zomuansanga, Saidingpuia Sailo, Lalhmunmawia, Vanlalthlamuanpuia Sailo leh setter H. Lalramdinmawia (Madina) te an la kawl a, a vawi khat nan CYMA Volleyball-ah champion an tum hle.

Coach David Malsawmtluanga chuan, "Muanna Veng hi team ṭha an nih miau avangin a harsa viau ang. Mahse, ka naute fitness a ṭha a, an theihna ka ringtawk a, kan hneh theih ngei kan ring," tiin Vanglaini a hrilh.

Muanna Veng hian Bethlehem (3-0), Zawlnuam Vengpui (3-0), Thingsulthliah Hospital Area (3-0), Hmuifang (3-0) leh Dinthar (3-1) in an hneh tawh a, quarterfinal-ah chauh set an la hloh. Kum 2018 champion hi tun ṭum inelnaah seeded ni pha lo mah se PVL-a TNT player Vanlalṭanchhana (Valbuanga), Sadrak Fanai, setter Lalliankima leh Peter Lalpekhlua te an awm a, Khawhai aiin an buk a rit mah zawk.