LBS Suzuki CYMA Volleyball Bungkawn leh Vaivakawn ten final an lut

CYMA leh MVA buatsaih LBS Suzuki CYMA Volleyball 2024 hmeichhe inelnaah Bungkawn leh Vaivakawn ten final an lut. Nomawi inchuhna hi August 16, Zirtawpni zan dar 8:00 hian R. Dengṭhuama Hall-ah khelh a ni ang.

Bungkawn hian anmahni ang bawka record nei ṭha Kanan chu 3-2 (23-25, 25-16, 19-25, 25-18, 15-4) in an hneh a, inkhel hnuhnung zawkah Vaivakawn-in Armed Veng South chu 3-1 (25-11, 19-25, 25-9, 25-21) in an hneh thung.

Record thar?

CYMA Volleyball-ah Bungkawn leh Kanan an langsar a, vawi sarih ve ve an champion tawh. Tun ṭuma an inkhel hi ropuina inchuh tiin a sawi theih a, a tawpah tawnhriat ngah zawk Bungkawnin kawng dik an zawh ta zawk.

Set hmasa berah an intluk tawk viau a, 23-23 te ni mah se Tetei hmangin Kananin 25-23 in set an la hmasa. Set hnihnaah erawh Bungkawnin harsatna lutuk nei loin 25-16 in set an la thung.

Set thumnaah setter ṭha F. Lallianchhungi telna Kananin 25-19 in an la leh thung. Bungkawn dinhmun chhe hman mah se an tawnhriat neih ṭhatna a lang.

Setter Melody Lallawmkimi'n (Meme-i) team a ho ṭha a, FP Lalduhkimi leh F. Lalparmawii te hoin set lina 25-18 in an la a, deciding set-ah 15-4 in an la zui bawk. Bungkawn hian kuminah nomawi an chawi thei a nih chuan a vawi riat nan an champion ang a, record thar siamin ropuina ramah an lut ang.

Vaivakawn hun

Vaivakawnin kum 2012 khan CYMA Volleyball-ah final an lut tawh a, kum 12 hnuah final an lut leh chiah. Semifinal hnuhnung zawkah Vaivakawnin Armed Veng South lakah bul an ṭan ṭha a, 25-11 in set khatna an la nghal.

Second set-ah AVS rawn insiamṭhain 25-19 in la mah se Vaivakawnin team ṭha zawk an nihna an pholang. Vaivakawn hian set thumna hi 25-9 in an la a, set linaah 19-3 a hma an hruai hnuah 22-18 te ni hman mah se 25-21 in hnehna an chang ta tho.

Vaivakawnin final an luh theih nan Lalramengi Ralte leh Sarah Lalsuiengi Tlaisun te an che ṭha. Armed Veng South erawh kum 2022 ang thoin semifinal-ah an tla a, B. Tlangmawii Varte, Malsawmkimi leh setter VL Hmuchhuaki ten an tum ram an thleng thei ta lo.