United fans an lam - De Ligt leh Mazraoui an la lut

Manchester United fan-ten season ṭan hmain lawmna tur an nei a, transfer bazar-ah Bayern Munich defender pahnih Matthijs de Ligt leh Noussair Mazraoui an la lut - player pahnih lakluh nan hian pound maktaduai 60 bawr vel an seng.

Red Devils hian De Ligt-a manah hian £38.5mtd pein, a khelh ṭhat dan a zirin £4.3mtd an pek belh dawn. Morocco defender Mazraoui tan erawh United an inseng tam lo a, £12.8mtd chu pek phawt tur niin, a khelh ṭhat dan a zirin £4.3mtd an pek belh ang.

De Ligt hian kum nga chhung atan contract a ziak a, Mazraoui hian kum li atan a ziak bawk - player pahnih contract-ah hian kum khat dang pawhsei theih dan a awm ve ve bawk a, United tlarhnung a khawng sawt tura ngaih a ni.

Player pahnih hi Manchester United manager Erik ten Hag hnuaia lo khel tawh ve ve an ni a, Dutch coach kaihhruaina hnuaiah tlangnel nghal thei tura beisei an ni - United fans an lawm ang.

Hmangaih hmasa

Kum 25 mi centre back De Ligt hi Ajax-ah Ten Hag nen lo thawk dun tawhin, Champions League 2019 semifinal an luh khan captain armband a hreng - Dutch coach Ten Hag hi amah siam liantu tiin a sawi theih a, a hnuaiah bawk a khel leh dawn ta.

De Ligt chuan, "Ka career ṭantir lama min kaihruaitu chu Erik ten Hag hi a ni a, keimaha ka theihna sang ber a sawr chhuak thiam hle - ani nena thawhdun hi ka châk tawh hle a ni," tiin a sawi.

De Ligt hian Ajax tan Eredivisie leh Dutch Cup nomawi a chawi hman a, 2019 khan Juventus a zawm. Italian club tan Serie A, Coppa Italia leh Supercoppa Italiana nomawi pakhat ṭheuh a chawi hnuah, kum 2022 khan Bayern Munich a zawm a, German club tan Bundesliga leh German Supercup nomawi a chawi.

Mahse, De Ligt hian Ajax-a defender beiseiawm tak ni chungin European top club-ah te beisei a phak lo. Juventus tan season thum chhunga match 117 khelin goal thum a khung a, Bayern tan match 73-ah goal nga a khung - season hman zawh takah phei kha chuan bul a ṭan phak meuh lo.

Beiseina

Mahse, De Ligt hian beiseina sang tak a nei a, Old Trafford-ah a vul leh theih a beisei. Dutch defender chuan, "Level sang bera hlawhtling tura tih ngai ka hria a, he club danglam takah hian ka record duhawm tak ka chhawm nun theih ka beisei," a ti.

Kum 25 chauh la ni mah se, De Ligt hi FIFA FIFPro World XI leh UEFA Team of the Year-ah pawh a lo lang tawh a, season hmasa lawkah German club tan inlan tam tawk lo mah se, 2022-23 season kha chuan Bundesliga team of the season-ah a lang bawk.

United hian an duhthlan hmasa zawk chu Jarrad Branthwaite a ni a, mahse, England tana vawi khat chiah la inlan defender hi Everton chuan £70mtd aia tlawma hralh an tum loh avangin an hawisan a, kum 22 mi defender aiah De Ligt lam an hawi.

De Ligt hian Netherlands tan pawh match 45 khel tawhin goal hnih a khung a, a kum zat ngaihtuahin a tawnhriat a hrawl hle. Red Devils hian Branthwaite aia an la lut hi tifuh zawk an la inti lo ang tih a sawi theih loh.

Hei le Mazraoui

Kum 26 mi Mazraoui pawhin Ten Hag a lo thawhpui tawh a, Ajax lama a pu hlui nena an inhrawn leh tur chu a lawm hle. Morocco international chuan, "Ka career-a ka vanglai tak ka tawng chho mek a, chutiang huna Ten Hag nena kan intawng leh ta hi ka lawm hle.

"Ten Hag-a'n a player-te aṭanga a beisei ṭhin chu ka hria a, hlawhtling turin ka theihna zawng zawng ka hlan ang," a ti - Netherlands-a piang Mazraoui hian Morocco tan match 28 khel tawhin, international football-ah pawh tawnhriat a nei ṭha tawk.

Ajax aṭanga a professional zinkawng zawh ṭanin, 2018-2022 inkar kha senior team tan a khel a, Eredivisie-ah nomawi pathum a chawi a, KNVB Cup (2) leh Johan Cruyff Shield (1) a champion bawk a, kum 2022 khan Bayern a zawm.

German club tan Bundesliga leh DFL-Supercup nomawi a chawi a, hmun erawh a chang phak meuh lo. Season hnih a khelh chhungin match 55 chiah a inlan a, goal khat khungin, assist vawi riat a nei.