Hammers defender thar Wan-Bissaka

West Ham United chuan Manchester United defender Aaron Wan-Bissaka an la lut a, kum 26 mi manah hian pound maktaduai 15 an inseng - kum sarih chhung an hnena khel turin contract an ziahpui a ni.

Crystal Palace aṭanga hming chhertu Wan-Bissaka hian kum 2019 khan Palace chhuahsanin Manchester United chu £50mtd-in a zawm a, match 190 khelhsaka goal hnih khungin, assist vawi 13 a nei.

United tan FA Cup leh League Cup-ah champion nomawi a chawi a, Old Trafford a pan tirha a chunga beiseina ang erawh a phak ta chiah lo. Wan-Bissaka chuan, "West Ham zawm turin ka inngaihtuah buai lo a, he hmuna ka awm thei hi ka lawm hle.

"Khelmuala luh a, player-te nena inhriatchian hun a nghahhlelhawm tawh khawp mai," a ti - Wan-Bissaka hi United-a amah la luttu Ole Gunnar Solskjaer awm chhung kha chuan first choice right back a ni a, mahse, Norwegian coach chhuah hnuah hmun a chang phak meuh lo.

Hei vang hian Bissaka a chhuak a, West Ham lawmah a tla. Hammers tan tun nipuia an player lakluh pariatna a ni a, Wan-Bissaka hma hian Jean-Clair Todibo, Crysencio Summerville, Luis Guilherme, Niclas Fullkrug, Wes Foderingham, Max Kilman leh Guido Rodriguez te chu an la lut tawh.