Chelsea-a senior tum Palmer

Premier League club Chelsea thiampuipa Cole Palmer chuan Stamford Bridge-ah cham zel turin contract thar a ziak a, a contract neih sa bakah kum hnih dang a ziah belh avangin kum 2033 thleng chu Blues-ah hian a cham dawn.

Palmer hian nikuma Blues a zawm khan kum sarih atan contract a ziak a, a contract thar nen chuan kum kua a khel dawn tihna a ni. Kum 22 mi attacking midfielder hian Chelsea-ah a contract a hmang zo a nih chuan kum 31 a tling hman dawn a, England international hian a contract zawh thlenga nupui a la nei lo a nih chuan Chelsea-ah tlangval senior a nih thlengin a awm dawn tihna a ni.

PFA Player leh Young Player of the Year nominee-a lang Palmer hian Blues-ah hian kar khatah £80,000 vel a hlawh mek nia sawi a ni a, a contract thar ang chuan kar khatah £120,000 vel a hlawh dawn niin khawthlang media-te chuan an tarlang.

Palmer chuan, "Contract thar ka ziak thei hi ka lawm hle. Chelsea-a ka season hmasa berah ka hlawhtling em em a, he club-ah hian mimal leh team ang pawha hlawhtlinna duhawm tak tak kan chan chhoh zel ka beisei," a ti a, a phur hle.

England tana vawi kua inlana goal hnih khungtu Palmer hi Manchester City academy chhuak niin, season hmasa ṭan dawn khan pound maktaduai 42.5-in Blues hi a zawm a, a season khatnaah a che ṭha nghal hle.

Palmer hian inelna hrang hrangah match 45 khelin goal 25 a khung a, assist vawi 15 a nei bawk. Premier League Young Player of the Season-ah thlan a ni a, season tharah pawh Blues tan player pawimawh a ni leh dawn.

Chelsea hian coach thar Enzo Maresca hnuaiah season thar an hmachhawn dawn a, August 18, Inrinni zan dar 9:00-ah champion lai Manchester City mikhualin, season bul an ṭan ang.