Chelsea-ah Chilwell, a zuitu tur Silva

Chelsea chuan August 26, Nilaini khan Leicester City aṭangin pound maktaduai 45-a Ben Chilwell an lakluh thu an puang. Blues hian Hakim Ziyech leh Timo Werner te an lalut tawh a, Brazilian defender Thiago Silva an lalut hnai bawk.

Kum 23 mi Chilwell hi Foxes academy chhuak a ni a, October 27, 2015-a Hull City nen League Cup-a an inhmachhawn ṭumin Claudio Ranieri-a'n a vawi khat nan senior team-ah a khelhtir a, a khel tluan.

English left back hian intuai hriam turin Huddersfield  Town chu loan-in a zawm a, hun rei a hmang lo. Foxes-in contract thar zawrhin kum 2021 thleng contract a ziak. Chilwell hian 2016–17 season aṭangin khelhna hmun a chang chho ṭan a, December 26, 2016 khan Premier League-ah a vawi khat nan a inlan.

Chilwell hi 5ft 10in-a sang a ni a, goal venhim a thiam ang bawkin ball pet a thiam a, English club lian zawk mit a la hle. Kum 2018-ah Leicester City tan player pawimawh a ni tawh a, September 11-ah England tan a vawi khat nan khelin KingPower Stadium-ah Switzerland 1-0 in an hneh. Chilwell hi ram tan vawi 11 a inlan tawh.

Foxes-in a pawimawhna hriain October 2018 khan kum 2024 thleng atan contract an ziahpui a, khelmual chhungah a chet ṭhat chhunzawm avangin a hlutna pawh a sang sawt. Chilwell hi season tawp lam khan inhliam vangin a inlan thei lo a, Foxes-in Champions League an khelh theih lohna chhan pakhatah a ngaih theih hial.

Chelsea-in attacking player aṭangin bul an ṭan, kumin February thla tawp khan Ajax winger Hakim Ziyech chu pound maktaduai 33.3 in an lalut tawh a. June 18 khan Timo Werner chu RB Leipzig aṭangin an lalut a, German forward pound maktaduai 54 man leh Ziyech te hian training an zawm tawh.

Blues-in player ṭha lalut mah se season liam ta Premier League-ah goal 54 zet an chhuah a, tlarhnung an thuam ṭhat a ṭul avangin bazar zel an mamawh. Transfer thuthangah erawh London club leh Kai Havertz an sawi ri ring a, goal venhim an mamawh miau avangin Chilwell an lalut leh Thiago Silva nena an sawi zawm hi thu lawmawm a ni. Chutihrualin Havertz pawh sawi bo theih a la ni lo a, German midfielder hian Stamford Brigdge a pan a rinawm chho hle.

Chelsea hian left back-a chhawr theih turin Emerson Palmieri, Marcos Alonso leh César Azpilicueta te an nei a; Palmieri attacking a na tawk lo a, Alonso defending a ṭha tawk lo a, Azpilicueta lah ke dinglama pet a nih avangin duhthu a sam lo. Blues-in left back an zawnna a rei ta a, hemi position atana an duh ber tih hiala sawi theih Chilwell an chang hi an vannei hle.

Chelsea player thar Chilwell chuan, "Frank Lampard-a kaihhruaina hnuaia player naupang rual zinga kal tel tur hi ka phur hle. Lampard hian player naupang zawkte chungah rinna a nghat a, amah nena kan inbiak khan ka hmin thlap," tiin Lampard-a hnuaia khelh a châk thu a sawi.

Blues hian defender laiah Antonio Rudiger, Andreas Christensen, Kurt Zouma leh Fikayo Tomori te an kawl a, theihna nei sang ni hlawm mah se kaihruaitu an mamawh. Chelsea an vannei a, PSG-a Thiago Silva contract a zawh chiah avangin an chang thei dawn.

Brazilian defender bakah Kai Havertz an lak ngei a rinawm avangin season thara Chelsea khelh dan tur en a châkawm ta hle. Chutihrualin season liam ta aiin season tharah manager Frank Lampard-a'n pressure a ngah sawt ang.