Maharastra-ah Mizoram Junior Taekwondo team

41st National Junior Taekwondo Championship & 14th National Junior Poomsae Taekwondo Championship chu Aurangabad, Maharastra-ah neih a ni dawn, inelna hmachhawn turin Mizoram team-te chu vawiin hian Aizawl an chhuahsan ang.

Team thlahna inkhawm hi nimin khan Electric Veng YMA Hall-ah neih a ni a. Joseph Thansanga, MATA General Secretary-in inkhawm kaihruaiin VL Sawma, Chief Technical Director leh R. Lalrinmawia, MSSC Sr.SPO ten fuihna thu an sawi. MATA president Prof.Rualkhuma Colney-in team uniform tlangzarhna leh team flag off-na hun a nei nghal bawk.

Mizoram aiawh turte hi mipa paruk leh hmeichhia panga niin, poomsae player 3 leh kyorugi player pariat te an ni a. Albert Lalrinfela New Serchhip leh Tv. Vanlalthlenga Ramthar North ten an hruai.