Villarreal-in Real an chelh

La Liga-a champion ngei tum Real Madrid-in Pathianni zan khan season thara Champions League khelh phak tum Villarreal an lo mikhual a, 1-1 in an inhnehtawk.

Santiago Bernabeu Stadium-a inkhelah hian Real Madrid tan an thiampuipa cristiano Ronaldo chuan goal a khung a, hei hi Villarreal tan Gerard Moreno chuan a sut a ni.

Inkhel chu

Real Madrid-in an mikhual an ngam a, an tlar hma lama Gareth Bale leh Cristiano Ronaldo-te inkawp an hlauhawm thei hle. Mahse, Real Madrid hian Villarreal keeper Sergio Asenjo an tawng hlauh a, an pet goal hleithei lo. Real tlar hma te'n an in ṭhelh siak a ni ber. First half-ah goal lut loin hun an khar.

Second half-an khel a, Real Madrid bawk a hlauhawm. Minute 52-naah Real-in goal an thun ta nge nge a, Villarreal defender Eric Bailly chuan penalty area-ah Ronaldo a ti tlu a, penalty a chawi. Penalty hi Ronaldo chuan petin goal-ah a chan tir a, tun season La Liga-ah goal 30 a thun ta.

Villarreal-in goal an phur rei lo a, minute 64 naah Moreno chuan Iker Casillas dan rual lohin yard 18 a hla aṭangin an si phurh sutna goal a rawn khung. Minute 71-naa Ronaldo head ṭha tak chu Villarreal keeper Asenjo chuan ṭha takin a lo dang bawk.

Hun tawp thlengin goal a luh belh tawh lo a, chak zawk awm loin inkhel an ṭin.

Goal khung harsat Real

Real Madrid hian Villarreal goal-ah vawi 25 zet an pet laiin Villarreal in Real goal a an pet zat hi vawi kua chiah a ni.

Villarreal keeper Sergio Asenjo chet ṭhat vang a nih rualin Real tlar hma hian goal zawn a pet an nei tlem hrim hrim a, vawi 25 an petah vawi 17 zet chu goal zawnah a kal lo. Tun season La Liga-a goal zawn loa pet hnem ber record thar an siam.

Khawvela player manto ber Gareth Bale hian game sarih chhung chu a zawnin Real Madrid tan goal a khung ta lo. Ronaldo hian season sawm chhungin La Liga player zinga penalty aṭanga goal khung hnem ber record a chelh ta bawk.

Villarreal tan he inkhel hi kum 2006 hnua Bernabeu Stadium-a point an hlawhchhuah hmasak ber a nih laiin Real Madrid tan erawh September 13, 2014-a Atletico Madrid 2-1 a an hneh loh hnua Bernabeu-a point an hlohna hmasa ber a ni thung.

Real Madrid coach Carlo Ance­lotti chuan, "First half-ah khan kan che vel hrim hrim kha a muang em em a, a laiah ball kan vawrh lut leh ṭhin tih loh kha chu chance kan nei meuh lo. Second half-ah tlemin kan zia deuh a, goal chance pawh vawi tam tak kan nei a, kan khung thei tlat si lo a ni," a ti.