Arsenal-in an dinhmun sawhnghet
Pathianni zan khan Arsenal chuan Emirates stadium-ah an mikhual Everton chu 2-0 in an hneh a, League-ah pathumna dinhmun an luah chhun zawm zel.
Arsenal tan Olivier Giroud leh Tomas Rosicky ten goal khat ve ve an khung a. Gunners hian match 27 khelh tawhah point 51 hmuin Manchester United chungah an awm a, pahnihna Manchester City chu point liin an la pha lo. Arsenal-in hmahruaitu Chelsea an phak lohna chu point 11 a ni.
Inkhel chu
Emirates stadium-a inkhelah hian team pahnihte hi an inbei tawk hle a, mikhual lamin goal khungna hun an nei hmasa a Arsenal defender Gabriel Paulista tihsual zarah striker Romelu Lukaku-a'n goal a khung teuh hle.
Bosnian forward Muhamed Besic shot ṭha tak chu Arsenal goal pawnah a khal hlauh. Olivier Giroud chuan hun ṭha a hmu ve nghal mai a, Alexis Sanchez hnen aṭanga a ball hmuh chu a tauh over hlauh. Hemi hnu hian team pahnih an in nawr tawn a, mahse goal erawh a lut mai lo.
Goal lut loin first half-an zo mai dawn emaw tih laiin chawlhlawk hma minute sarih chauh a la awm tihah Mesut Ozil a corner pet chu Giroud-a'n mawi tak maiin a pet goal. Goal dang a lut tawh lo, 1-0 in chawlhlawk an hmang.
Second half-ah thil thleng langsar a tam lo, mikhual lamin si phurh sut duh mah se Arsenal tlarhnung an su tlang zo lo. Arsenal lam pawhin goal thun belh ai chuan venhim an ngai pawimawh tawh zawk.
Hun tawp hma minute hnih chauh a awm tawh tihah goal a lut leh. Alex Oxlade Chamberlain thlaktu Rosicky chuan box pawn aṭangin ṭha tak maiin Everton goal-ah a thlawh lut. Goal dang luhna hun a awm tawh lo. Arsenal-in point thum an hlawh a, table-ah pathumna an ni zui.
Eng nge an sawi?
Arsenal boss Arsene Wenger chuan, "Tuna chak result kan nei thei hi a lawmawm hle a ni. Champions League-ah result ṭha lo tak kan nei zo chiah a, tunah chuan hmalam kan en leh thei ta. Chak duhna thinlung kan nei a, point thum hmuh ngei tumin kan bei ṭang ṭang bawk. A tawpah kan phu ang ngeiin kan duh chu kan hmu," tiin a sawi.
Sawi chhunzawmin Wenger chuan, "Striker chuan goal khung tumin goal-ah a pet tur a ni. Goal khung reng hi thil theih a ni lo a, mahse a la khung belh zel ang. Striker zawng zawngin goal an khung pup pup reng lem lo," tiin a striker Giroud chungchang a sawi.
Everton boss Martinez chuan, "Vawiin kan inkhel khan tun season a kan dinhmun a sawifiah hle in ka hria, kel ṭha tak chung siin point kanhmu lo leh a ni. Kan khelh danah kha chuan point hmuh kan phu hle, mahse kan vanduai leh tlat si. Kan phu ang tawk point hi hlawhchuak ṭhin ila chuan table-ah pawh a sang zingah kan awm thei tur a nia, mah se kan la beidawng lo," a ti.