England tan Pietersen a kir maithei

England and Wales Cricket Board chairman thar tur Colin Graves chuan England batsman Kevin Pietersen tan England chu a in hawn reng tur thu a sawi.

May thlaa ECB President ṭang lai Giles Clarke thlak tur Graves chuan, "Pietersen hian England tana khelh leh a duh takzet a nih chuan county cricket tal a khelh a ngai a ni. Thutlukna erawh ka siam tur a ni lo a, coach leh selector te thu thu a ni. English cricket tana ṭha tur chu anni hian an hria a ni," a ti.

Kum 33-a upa Kevin Pietersen hi nikum khan ECB chuan England cricket team hmachhawpah a tel tawh loh thu leh kal dan phung thar an duang tur thu an lo hrilh tawh a ni.

Pietersen hi January 2014-a Ashes Test Australia nen an khelh hnuin Twenty20 aia game sang a la khel leh lo. IPL club Delhi Daredevils, Surrey, St Lucia Zouks leh Melbourne Stars te tan Twenty20 erawh a khel a ni. A khelh hnuhnun berna Surrey hian August khan an chhuah tir a, hemi hnu hian pangngai takin cricket a la khel leh lo.

England hi 2015 ICC World Cup-ah an che chhe hle a, match li khel tawhin match khat chiah an la chak a, an hneh hi team tenau anga ngaih Scotland an ni.