Mourinho kaihhruai Chelsea an champion
Wembley Stadium-ah Chelsea-in Jose Mourinho hnuaia khel an ni tih an lantir a, ball chang tlem zawk nichungin Tottenham Hotspurs 2-0 in an hneh a, Capital One Cup-ah an champion.
Portuguese manager game plan a hlawhtling a, Chelsea an vannei tel bawk. First half tawp hma hretin captain John Terry ball pet chuan Spurs forward Harry Kane perin keeper Hugo Lloris dan hman lohin a lut a, minute 56-naah Diego Costa shot chu Spurs defender Kyle Walker-a'n an lamah a tilut palh.
Thibaut Courtois aia thlan veteran keeper Petr Cech-a'n goal a chhuah lo a, League Cup-a Spurs regular keeper Michel Vorm aia lut French keeper Lloris-a'n goal hnih a chhuah thung.
Goal venhim
Mourinho-a'n hrem vangin Nemanja Matic an chhawr thei lo a, a aiah Ramires a luh tir.
Midfield-a Brazilian midfielder kawppui turin French defender Kurt Zouma a lut a, Chelsea starting eleven thlirin goal venhim an ngai pawimawh tih a chiang.
Tottenham tlar hmaah Kane a mal tlat a, West Ham United an draw ṭuma khel lo Christian Eriksen leh Nacer Chadli te chu Erik Lamela leh Mousa Dembele te aiah an lut a; manager Mauricio Pochettino-a'n a duh dan thlapin a rem niin a lang.
Nomawi inchuh chu
Wembley Stadium chei ṭhat hnuah Chelsea-in a vawi 13-na atan inelna lian tham final an khel a, an khelh hnuhnun ber chu 2012 FA Cup final-a Liverpool an hneh kha a ni.
Ṭan phat aṭangin inkhel a nung nghal a, minute kuana lekah Cesc Fabregas-a freekick chawi chu Eriksen-a'n a pet a, crossbar a ri dawp a, a goal lo.
Spurs-in inkhel an thunun a, Chelsea-in counter attack hmangin an bei let thung a, inkhel hmuhnawm a tling.
First half injury time-ah Willian-a freekick chuan player ṭhahnem tak a per hnuah Terry zawn a thleng a, Chelsea captain ball pet chuan Harry Kane a per hnuin a goal.
Second half ṭan aṭanga minute 11-naah Fabregas-a bicycle kick chu keeper Lloris-a'n dang mah se a per chu Costa-a'n goal-ah a pet leh nghal a, goal zawnah a kal lo nachungin Walker-a'n an lamah a ti lut.
Goal hnih luh hnuah Chelsea manager Mourinho ropuina a lang chhunzawm a, Spurs-in ball an chang nachungin goal khungna hun ṭha an nei lo.
Portuguese manager-in Chelsea a let leh hnua a vawi khatna atan London club nomawi a chawi pui a. Captain Terry-a'n Chelsea tana season 17 a khelh chhungin nomawi 15 a chawi ta bawk.
Final khelh zawh titi
Chelsea manager Jose Mourinho chuan, "Ka player-te khan an khel ṭha takzet a ni. Final thlir dan hi ka nei a, final apiangin a chak theih loh tih ka hria. Mahse, ka player-te an in man em em a, Spurs lam kha kan nawr na takzet a ni. Counter-attack aṭanga bei let tura inring kan ni a, mahse final khelh dan tur dik takin kan khel chhuak ta zawk a ni," tiin a nau te a chhuang hle.
Ṭawng duh ve tak Mourinho chuan, "Tottenham hian final khelh hi an phu a, an khelh dan kha kan en chuan champion nomawi hawn an phu a ni," tiin an tumpuite a fak.
Tottenham manager Mauricio Pochettino chuan, "Final-a khelh dan tur dik takin kan khel a ni. Chelsea ka lawmpui rualin ka player-te ka chhuang takzet a ni. Kan khelh ṭhat vanga ka lawm em em rualin min ṭantute ka tawrhpui a, ṭha taka kan khel chunga an tan nomawi kan chawi thei lo hi a pawi ka ti. Tunah chuan kan hmabak inkhelh tur la awmah te kan rilru kan dah a pawimawh tawh a ni," a ti.
Chelsea captain John Terry chuan, "A ropui takzet a ni. Hei hi kan tan chuan bul ṭanna ṭha tak a nih ka beisei a, tunah chuan league lamah kan insawrbing a hun leh tawh. Chak kan phu a, kan manager Mourinho-a'n he inelna a lak thutak avang hian ka lawm takzet a ni," a ti.
Spurs striker Harry Kane chuan, "A chak lo zawk nih hi chuan a hrehawm duh em em a, a bik takin final-a chak lo zawk nih hi a hrehawm a ni. Kan theihna zawng zawngin kan khel a, kan khel ṭha viauin ka hria. Kan khelh dan avang khan inchhuang tur kan ni a, team naupang tak manager thar hnuaia inenkawl mek nichungin hetiang dinhmun hi kan thleng thei a ni," a ti.