Santosh Trophy Tlai dar 3:00-ah Mizoram Vs Delhi

March 1 khan Punjab-ah India ram state hrang hrang tana football inelna sang ber Santosh Trophy chu khelh ṭan a ni a, vawiin hi champion lai Mizoram inlan hun a ni.

Tlai dar 3:00-ah Mizo­­ram-in Guru Go­bind Singh Stadium, Jalandhar-ah Delhi an hmachhawn dawn a, Mizoram hian Delhi hi Santosh Trophy-ah an la hneh ngai lo. Punjab-ah ruah a sur nasat avangin inkhelhna sta-dium hi sawn theih a ni.

Team dang palite

AIFF-in group an siam dan ni a mak hle. Nikuma champion Mizoram leh final-a an hneh tak Railways chu group khatah an dah.

Team pali hi an inkhel vek tawh a, Mizoram hi inkhel hnuhnung ber tur an ni. Mizoram vanneihna chu an khingpui team-te inkhel an en vek hman tihna a ni a; nimahsela an vanduaina chu ni riat chhungin match li an khel dawn a, a hahthlak ang.

Pathianni khan Delhi-in an Group B game hma­sa berah nikuma finalist Railways goal awm loin an draw a, team chhia an ni lo tih a chiang.

Nimina Group B-a inkhel dangah Kerala-in Goa 1-0 in an hneh bawk.

Group A-ah Punjab-in Prabhjot Singh leh Rajbir Singh-te goal hmangin Assam 2-0 in an hneh.

Mizoram XI?

Champion lai starting eleven tur a la chiang lo. Keeper-ah MPL ṭum thum neih tawha best keeper lawmman dawng vektu Lalawmpuia awm ngei tura rin a ni.

Defence laiah Chan­mari defender Lalrin­chhana kawppui tur a chiang lo. Registration buai vanga match khel tam lo Lalruatthara emaw Dinthar defender Ronald Zothanzama emaw an awm ang.

Vei lam sirah inhliam Ricky Lallawmawma aia koh Lallawmzuala a awm rin a ni a, ding lamah Lalrinzuala Khiangte a inlan hmel bawk.

Veteran Samson Ram­engmawia'n midfield a kaihhruai dawn a, a kawppui tura awm thei chu Johny Lalfakzuala emaw Police captain V. Lalṭanpuia emaw a ni. Samson-a hian ding lama a pet avangin amah ang bawka ding lama pet Ṭ-a aiin vei lam hmang thiam Johny-a awm beisei a ni.

Wing-ah H. Lalmuan­kima leh Lalbiak­hlua-te an awm tura ngaih an ni a, chhawr theih turin Lal­ruat­fela, Lalrinfela leh Lal­dingngheta-te an awm.

Forward-ah Zico Zorem­sanga a awm dawn a, a hnung chiahah F. Lalrinpuia a awm ang. Coach H. Van­lalthlanga'n Santosh Tro­phy an champion ṭuma forward pahnih a hmang a nih chuan Chan­mari for­ward Malsawm­fela bench-ah a ṭhu dawn tihna a ni a, Sawmfela hi MPL3-a substitute aṭanga goal khung thei zet kha a ni.

Coach thukhawchang

Mizoram manager H. Vanlalthlanga chuan, "Punjab-ah chuan ruah a sur reng a, field a diak avangin khelh a har khawp ang. Ruah sur vang hian practice vawi khat chiah kan practice thei a, chutihrualin team dang pawhin harsatna an nei tho ang," tiin boruak awm dan a sawi.

Khingpui tur chung­chang sawiin Thlanga chuan, "Delhi hi team ṭha pangngai tak an ni. Game mumal tak nei lo mah se an nawr vak thei a, vanduai theih a ni. Kan team hi kan champion ṭum ai khan kan ṭha zawkin ka hria a, kan chak erawh ka ring. Mizoram mipui ṭawi­awmna kan ngen a, an ṭawngṭaipuina kan mamawh a ni," a ti.

Mizoram Squad
Goalkeepers : Lalawmpuia, Lalruatpuia; Defenders : Ronald Zothanzama, Vanlalchhanhima Sailo, Lalrinchhana, Lalrinzuala Khiangte, Lalruatthara, Lallawmzuala; Midfielders : Samson Ramengmawia, V. Lalṭanpuia, Lalbiakhlua, H. Lalmuankima, Johny Lalfakzuala, Laldingngheta, Lalrinfela; Forwards : Lalruatfela Zote, Joseph Lalnunpuia, F Lalrinpuia, Malsawmfela, Zico Zoremsanga.