Premier League kan nghak chhuak ta; Zanin dar 12:30-ah Man United Vs Fulham
Premier League 2024/25 season chu zanin aṭangin khelh ṭan a ni dawn a, zanin dar 12:30 hian Old Trafford-ah Manchester United-in Fulham an mikhual ang. Erik Ten Hag-a hote hian kar liam ta khan Community Shield-ah Manchester City hneh lo mah se Wembley Stadium-a an khelh dan avangin beiseina sang tak an nei ang.
Tun season Premier League-ah hian club thar pathum Leicester City, Ipswich Town leh Southampton te an awm a, anni hian Luton Town, Burnley leh Sheffield United te an thlak. Season liam ta khan Premier League kai thar pathum an relegate lehnghal vek!
United tan phurna
Man United defender thar Leny Yoro leh striker Rasmus Hojlund te season thar atana inpuahchahna inkhelah an inhliam a, an chawlh rih a ngai dawn. Defender thar Yoro inhliam vangin Man United-in defender thar an dap lehnghal a, Bayern Munich aṭangin Matthijs de Ligt an lalut. Dutch defender hi zanina bul ṭan thei tur dinhmunah a ding.
Community Shield-ah defence laiah Harry Maguire leh Jonny Evans te an inkawp a, Lisandro Martinez chu vei lamah an chhawr. Luke Shaw, Tyrell Malacia leh Victor Lindelof te inkhel tura an la inpeih loh avangin Bayern aṭanga lak thar tho Noussair Mazraoui pawh bul ṭan tura ngaih a ni a, ding leh veia a khelh kawp theih avangin mual vei lamah a awm thei ang.
United hian Hojlund thlawp turin Joshua Zirkzee an lalut a, Dutch forward hi Community shield-ah a ṭhu tluan. Zanin hian Zirkzee hi a inlan rinawm mah se bench aṭangin a luh a rinawm zawk a, Bruno Fernandes-a'n 'false nine' hna a chelh pawhin a mak hran lo ang.
Midfield-ah Kobbie Mainoo leh Casemiro te chu bul ṭan tura ngaih an ni a, mual sirah erawh Marcus Rashford, Amad Diallo, Antony, Jadon Sancho leh Alejandro Garnacho te an awm avangin inlan tur hriatthiam a har hle. City laka goal khungtu Garnacho leh chance ṭha hlahtu Rashford te chu bul ṭan turin an khan ber.
United an indinthar
Ten Hag-a hnuaiah Man United-in season hnih an khel tawh a, League Cup leh FA Cup nomawi an chawi tawh a, 'nil' an la nei lo. Kumina Man United-in beiseina thar an neih chhan hi Ten Hag vang ngawt a ni lo a, neitu thar an neih vang a ni.
Sir Jim Ratcliffe-a'n a company INEOS hmanga Man United-a neitu nihna an neih hnuah a, khelmual chhung leh pawnah hmasawnna hmun tur a awm ṭan. Old Trafford-a player chhuahna (tunnel) te pawh chei ṭhat a ni a, stadium ṭha zawk nei turin hmalakna a awm mek bawk.
Man United chief executive thar Omar Berrada chuan, "Nipui bazar kan hmang ṭha. Joshua Zirkzee, Leny Yoro, Matthijs de Ligt leh Noussair Mazraoui te kan lalut a, Bruno Fernandes leh Ten Hag-a te contract kan pawhsei bawk," tiin a sawi a, inelna ṭan hmaa an duh ang player an la hman hi hmasawnna a tling.
Fulham hi
Fulham-in hliam an nei lo a, Marco Silva-a'n nipui bazara a lakluh defender Jorge Cuenca leh midfielder Emile Smith Rowe te chu bul ṭan nghal tura ngaih an ni.
Cottagers hi season liam ta khan 13-na an ni a, an player pawimawh Joao Palhinha, Tim Ream leh Kieron Bowie te nipui bazarah an chhuah. Palhinha hmunruak hi hnawh khat a harsa ang.
Chutihrualin manager Silva erawh Saudi Pro League club Al-Ahli aṭanga sawmna ṭha tak a dawng chungin England-a cham a tlang zawk. Silva kaihhruai team hi Premier League match hmasa berah an tlawm ngai lo a, vawi kua zet opening day inkhela an tlawm tawh lo tih hriat a ṭha.