Nomawi nena bul ṭan Real leh Mbappe

Real Madrid-in nipui transfer-ah Kylian Mbappe an la lut a, French forward hoin season thara an match hmasa berah nomawi an chawi nghal - Real hian Nilaini zan khan UEFA Super Cup-ah Atalanta chu 2-0 in an hneh.

European champion tan Kylian Mbappe chuan a match hmasa berah goal a khung nghal a, French forward hma hian Federico Valverde chuan goal hmahruai a khung bawk - Europa League nomawi chawitu Atalanta-in a chhanletna tur an nei lo.

Mbappe-a'n European football inelnaah nomawi a la chawi miau loh avangin UEFA Super Cup a la khel ngai lo a, a khelh hmasak berah goal khung nghalin, nomawi a chawi nghal bawk. Real fans tan thlir nin a har ang!

Real Madrid hian August 18, Pathianni zan dar 1:00-ah tun season-a an league match hmasa ber khel turin Real Mallorca an lenchilh dawn a, fan-ten nghakhlelin season thar an thlir mek.

Mbappe a bo

Kazimierz Gorski National Stadium, Warsaw-a inkhelah a tawpa sawi hlawh ber chu Mbappe ni mah se, inkhel ṭantir lamah erawh hmuh tur a vang hle - Carlo Ancelotti-a'n tlarhmaah Mbappe, Vinicius Jr leh Rodrygo a tlar thei a, midfield-ah Jude Bellingham a awm bawk.

Mahse, Atalanta boss Gian Piero Gasperini-a'n fimkhur a ngai tih hriain a naute a rem phui ṭha a, 3-4-1-2 a remin, Real tan hmun awl an siam duh lo - season hmasaa league leh Champions League nomawi chawi kawptu Real an che thei lo a ni ber.

Mbappe awm vangin Bellingham khelhna a buai lo ang, tiin Ancelotti-a'n lo sawi tawh mah se, khelmual an luh meuh chuan danglamna hmuh tur a awm - tlarhmaa tal tam ṭhin Bellingham chu goal nawr aiin a venhim lam hna thawk tura tih a ni.

He ruahmanna hi Real hian an ṭhatpui lo tiin a sawi theih a, an tlarhma an fuh tak tak thei lo. First half-a an chance duhawm ber chu Rodrygo koah a tla a, mahse, bar a tihper - first half-ah Mbappe hoin Real an reh.

Danglamna chu

Ancelotti-a'n thil tihdanglam a ngai tih a hai lo. Mual vei lamah Mbappe a tawlhtir a, Vinicius Jr chu a laiah zalenna pek niin, hei hian tlarhma lamah Bellingham a tal tam tir sawt bawk - minute 59-naah goal an khung nghal.

Vinicius Jr-a siamsak chu Valverde chuan superstar rual karah hmahruaina goal ni turin a khung a, team nem zawk Atalanta tan chuan a harsa sawt dawn tih a chiang tawh - he goal luh theih nana hna thawktu chu Bellingham a ni.

Minute 68-naah Bellingham bawk a inlar nawn - Mbappe tana a siamsak chu French forward hian chak taka a tlanpui hnuah, Real tana a goal hmasa ber ni turin a khung a, thawm a ring takzet.

Real-in tun hnaia rawlthar beiseiawm Endrick leh hliam damkawr Eduardo Camavinga chu chhawr lohin bench-ah an dah tluan thei a, David Alaba a la inhliam a, Brahim Diaz, Arda Guler leh Luka Modric te ho bench aṭangin an la luhtir thei bawk a, Ancelotti naute hi an ṭha leh tawh hle.

King Carlo

Real coach Ancelotti tan Spanish club-a nomawi 14 a chawina chiah a ni a, Italian coach sulhnu hi uanpui tham a ni - Super Cup nomawi vawi nga a chawina a ni a, Real tan vawi thum chawi tawhin, AC Milan tan khan vawi hnih a chawi hman.

Spanish club hi La Liga (2), Copa del Rey (2), Supercopa de Espana (2), Champions League (3), UEFA Super Cup (3) leh FIFA Club World Cup (2) nomawite a chawi tawh.

Kum 65 mi coach hi Juventus, AC Milan, Chelsea, Paris Saint-Germain leh Bayern Munich-a a hlawhtlinna zawng zawng ziak vek dawn ila, a hranpaa ziah tham daih a ni a, hmunin min daih rih lo.

Ancelotti chuan, "Mbappe-a'n a khel ṭha takzet a, he team-ah hian a insiamrem hma hle. Vinícius Jr leh Bellingham te nen pawh an inman takzet - he team hian theihna sang tak kan nei a, a pawimawh ber erawh kan khelh ho a ni a, chutiang tak chuan zaninah khan kan ti a ni," a ti.

Thilpek hlu ber

Mbappe-a'n a naupan laia a club ṭan em em Real Madrid a zawm a, a match hmasa berah goal a khung nghal a, a nomawi la chawi ngai loh a chawi - hei lo liama bul ṭan dan duhawm a awm dawn bik chuang em ni?

Kum 25 mi forward chuan, "Zan duhawm tak a ni a, he hun thleng tur hian rei tak ka nghak tawh a ni. Real jersey ha a, he club badge nen ka inlan thei te, fans duhawm tak takte tana khelmual ka lut theite hi - ka tan chuan thilpek hlu tak a ni," a ti.

Mbappe chuan sawi zawmin, "Real Madrid tana khel kan ni a, duhtawk chin kan nei lo. Goal 50 ka khung aia pawimawh erawh hnehna chan a, team anga hmasawn zel a ni - a chhan chu team ang bakin kan chak dawn lo," a ti a, mimal ringawt inngaihtuah a rem loh thu a sawi.

Bellingham chuan a ṭhian thar hi fakin, "A hriam em em a, technical quality a nei sang hle bawk. Khelhpui nuam tak a ni a, midang ang thoin team tan a khel - kan chak a, fak a phu a ni," a ti a, a ṭhianpa a fak.