David-a goal a tawk zo lo

Asian football-a a inlan hmasak berah David Lalhlansanga'n goal a khung nghal a, mahse, Mizo tlangval goal khung hi East Bengal tan chakna a tling zo lo. Nilaini zan khan AFC Champions League Two preliminary round-ah East Bengal hian Altyn Asyr an mikhual a, 3-2 in an tlawm.

Salt Lake Stadium-a inkhelah Kolkata club tan David Lalhlansanga chuan minute sarihna lekah goal hmahruai a khung a, mipui 27,892 te thawm a ṭha hle. Mahse, Turkmenistan club tan Myrat Annayew, Selim Nurmuradow leh Mihail Titow ten an chhanglet a, 3-1 a ni.

East Bengal tan Saul Crespo chuan si phurh sut ṭhen ve mah se, awmzia a nei phak lo a, 3-2 in East Bengal an tlawm. East Bengal hian Indian Super Cup an champion avangin Asian football-a club inelna sang ber dawttu AFC Champions League Two preliminary round hi an khel a, mahse, an chak loh nghal avangin an khel chhunzawm dawn lo.

AFC Challenge League lamah East Bengal hi an inlan zui dawn a, hei hi Asian football-a inelna sang pathumna a ni - European football-ah chuan Europa Conference League nen thuhmun a ni.

Mohammedan SC aṭanga East Bengal zawmtu David chuan, "Durand Cup leh Asian football-a East Bengal tana ka match hmasa berah goal ka khung ve ve a, ka lawm khawp mai.

"Goal khung hi chu ka châk reng ṭhin a, mahse, kan squad a chhah em avangin ka beisei ngam lo. Khelmuala ka inlan phawt chuan khung zel ka tum ang," tiin Vanglaini a hrilh a, Kolkata club-ah hmun pawimawh chan a tum.