CYMA Volleyball mipa final khel tur a chiang; Hunthar hmachhawn tur Muanna Veng
LBS Suzuki 23rd Inter Branch YMA Volleyball Tournament 2024 khelh laiah mipa final khel tur a hriat ta - Hunthar leh Muanna Veng ten an khingpui ve ve hnehin semifinal an paltlang. August 17, Inrinni zan dar 8:00 hian R. Dengṭhuama Indoor Stadium, Mualpuiah final khelh a ni ang.
Nimin chawhnu lam semifinal hmasa zawkah Hunthar chuan Chhinga Veng chu 32-30, 20-25, 25-27, 27-25, 15-9 (3-2) in an hneh a, a hnuhnung zawkah Muanna Veng chuan team hmuhnawm Khawhai chu 17-25, 28-26, 19-25, 25-19, 15-13 (3-2) thoin an hneh ve bawk.
Vawi thum champion tawh Hunthar hi coach Lalṭhazuala enkawl niin, inkhelh hmain Lalbiakmuana leh Fabian Lallunghnema te an ven uluk tur thu Vanglaini a hrilh a, an sawi ang ngeiin player pahnih hi an veng uluk hle.
An inkhel tawk takzet a, tualchhung volleyball inelna sang Pro Volleyball League khelh zawh taka Mizo Best Player Fabian-a leh a ṭhiante hian Hunthar pawh an ti chiai hman hle, a tawpah erawn tawnhriat nei ṭha Hunthar an nihna kan hmu.
Hunthar hian CYMA Volleyball nomawi bakah PVL title pawh an kawl mek a, tualchhung volleyball sawi chuan an hming hi lam hmaih theih a ni lo. Pro League aṭangin inhnukdawk mah se player naupang zawkte chher an la tum tih a chiang a, nomawi humhim tumin thapui an thawh
bawk ang.
Chhinga Veng erawhin theihtawp chhuah mah se an tum ram an thleng thei rih lo, semifinal thleng turin straight set hmanga chak an nei miah lo a, harsa angreng taka tlang ṭhin an nih avangin team ṭha leh khauh lakah an ṭang zo lo.
Semifinal hnuhnung zawkah Khawhai lamin bul ṭan fuhin set khatnaah chuan harsatna lian tham an tawk lo tihin a sawi theih, set hmasa ber bikah chuan a khel ṭha leh chungnung zawk an ni chiang hle.
Set hnihaah Muanna Vengin thapui an thawh a, hma an hruai deuh reng - mahse point 20 bawrah Khawhai hian umphakin hmahruaitu an in nih chhawk zak zak, hun pawimawhah Valbuanga'n a hlap thlak bakah an khingpui hlap dansakin set an lak theih nan a ṭangkai.
Team pahnih an inthlau lo, set thumnaah pawh kal fal thei an awm chuang lo; 19-19 a nih laiin Muanna Veng lam service tur chiah a ni a, player ṭha Valbuanga chu ball kengtu a ni - inringtawk takin service mah se a out hlauh a, point hmuh belh tawh loin set an hloh.
Muanna Veng tan Lalliankima leh Lalsaitluanga ten set linaah point an nei leh zauh ṭhin a, an khingpui player ṭha Zomuansanga hlap dansakin point ngain an kal fal a, hnufual lai nei tawh loin set an la; 2-2 niin set nga hmangin final lut tur zawk chinfel a ngai.
Set ngana hi point 15 thleng chauh a nih avangin vawi khat tihsual a pawi thui bik. Point an inhmuh chhawk zak zak a, point thum ve ve an neih hnuah Muanna Vengin vawi nga hmu zawnin a dinhmun an siamṭha.
Point nga ngawta an hniam hnuah pawh Khawhai an beidawng duh bik lo - Zomuansanga leh Saidingpuia Sailo hmanga beiseina insiamin an inkar chu point khatah an ti zim leh a, beiseina nei sang ve leh viau mah se Muanna Vengin an mamawh tawk point sual chhuakin an chak.