ISL - September 13-ah khelh a ni dawn
India rama football league sang ber, Indian Super League chu September 13, Inrinni aṭanga khelh ṭan turin ruahmanna siam a ni a, team 13-in inelna an hmachhawn dawn - I League aṭangin kai thar Mohammedan SC chuan an belh dawn.
Mohammedan bakah hian Bengaluru, Chennaiyin, East Bengal, FC Goa, Hyderabad, Jamshedpur FC, Kerala Blasters, Mohammedan SC, Mohun Bagan SG, Mumbai City, NorthEast United, Odisha FC leh Punjab FC te chuan ISL hi an khel ang.
October 14, 2019 khan Kuala Lumpur-a Asian Football Confederation (AFC) hmunpuiah All India Football Federation (AIFF) chuan Indian football kalphung tur hi a lo puang tawh a, he ruahmannaah chuan season thar aṭang hian relegation pawh awm tur a ni. Mahse, AIFF chuan relegation hi awmtir dawn rih lo.
Season hmasa ISL-ah khan Mizoram player 27 ngawtin inelna an hmachhawn a, hetihrual hian season laihawlah transfer neuh neuh a awm ve avangin season a tawp meuh chuan a danglam tawh mai thei - tun season-ah Mizo player hi pung tura ngaih a ni.
Team thar
Tun season ISL-ah team thar an awm leh dawn a, Mohammedan Sporting Club an ni. Kolkata club hian season hman zawh takah khan I League nomawi an chawi a, lawmman atan ISL-a kaisan a tel tak avangin Indian top flight league an khel dawn.
Season hmasa khan Punjab FC chuan I League nomawi an chawi hnuah ISL an lo khel tawh bawk a, sum hmanga ISL-a hmun ruak lei club 11 zingah champion vangin club pahnih an khel ve dawn ta, tihna a ni.
Mohammedan hi ISL-ah tih mai mai an tum lo. Shrachi Sports chuan 30.5% stake Kolkata club-ah hian an lei thar a, hetihlai hian Bunkerhill Private Limited chuan 30.5% neih chhunzawmin, Mohammedan SC chuan 39% share an la neih chhunzawm zel thung.
Kolkata club-te vanneihna pakhat chu chief minister Mamata Banerjee-i'n a tuipui tlat hi a ni a, Mohammedan SC hian season hmasa khan West Bengal sorkar aṭangin ṭanpuina cheng nuai 50 an dawng a ni.
Tute nge coach?
ISL club 13 zingah Spanish coach an tam ber a, coach paruk an awm. An zingah Bengaluru coach Gerard Zaragoza, East Bengal boss Carles Cuadrat, India senior team leh FC Goa enkawl kawp tur Manolo Márquez, NorthEast United boss Juan Pedro Benali leh Odisha boss Sergio Lobera te hi mi thar an ni lo.
Mohun Bagan coach thar José Francisco Molina pawh hi mi thar chan chang viau mah se, Villarreal boss hlui hian 2016-ah khan ATK a lo enkawl tawh a, a tlangnel tawh. Mumbai City boss Petr Kratky hi Czech Republic lam mi a ni.
Scotland aṭangin Owen Coyle chu coach awmchhun niin, Chennaiyin a enkawl dawn a, Kerala Blasters coach thar Mikael Stahre hi Sweden lam mi daih niin, Chinese Super League leh MLS lam thlenga club enkawl lo nei tawh a ni.
Mohammedan boss Andrey Chernyshov hian I League-ah club kaihruai tawh mah se, ISL erawh a tel vawi khatna tur a ni. Mahse, Spartak Moscow enkawl tawh a ni a, ISL pressure-a buai tur a ni lo - Punjab coach Panagiotis Dilberis hi Freece mi niin, ISL-a season khatna tur ve tho a ni bawk.
Indian coach
Tun season ISL-ah Indian coach pahnih an awm dawn a, Hyderabad FC coach Thangboi Singto leh Jamshedpur boss Khalid Jamil te an ni. Thangboi hi Manipur lam mi niin, Shillong Lajong aṭanga hming chher a ni a, Meghalaya club hi January 2013-June 2017 inkar kha a lo enkawl tawh.
Thangboi hian NorthEast United, Kerala Blasters leh Delhi Dynamos-ah te assistant coach hna a lo chelh tawh a, July 2023 aṭang khan Hyderabad-ah hian head coach niin ISL club a enkawl ve ṭan.
Indian football ngainatu zingah Khalid Jamil hre lo an awm lo ang. India international hlui hian Mumbai FC, Aizawl FC, East Bengal, Mohun Bagan, NorthEast United leh Bengaluru United te a lo enkawl tawh a, a sulhnu a hraw hle.
Kum 2017 I League-a Aizawl FC a champion pui chu tun thlenga Indian football chanchin ngaihnawma sawi tel a la ni a, thla hmasa lawk khan AIFF Awards-ah Coach of the Year atan thlan a ni.