City midfielder Bobb a inhliam

Manchester City midfielder Oscar Bobb chu an training laiin a hliam a, a chawlh chen tur la sawi chian theih chiah loh mah se Premier League season tharah bul a ṭan thei dawn lo tih erawh a chiang.

Kum 21 mi Bobb hi training laiin, amah chauha a awm laiin a inhliam - English chanchinbu ten an tarlan dan chuan a ke ruh a tliak niin an sawi a, enkawl dawng turin Barcelona lam an pan pui.

Norway international Bobb hian 2019 khan Valerenga aṭangin Man City hi a zawm, season thar lo awm tur inbuatsaihna an neih hoah a khel ṭha ṭhin a, coach Pep Guardiola mit pawh a tlung hman hle.

Tawnhriat ngah player ṭhenkhatin training an zawm tlai a, hei vang hian Bodd hi dam ni se la chuan tun kar tawpa Chelsea nen EPL match hmasa an khelh hunah pawh inlan tura ngaih a ni, mahse a chawlh a ngai dawn ta zawk.

Season hmasa khan Bobb hian inelna hrang hrangah Man City tan match 26 a khel a, kumin February thla khan Etihad Stadium-ah kum nga dang cham chhunzawm turin contract a ziak thar a ni.