US Open-ah Osaka, Andreescu leh Wawrinka

Tennis inelna lian zinga hnuhnung ber US Open khelh hun a hnai a, tun hma lama lo champion tawh - Naomi Osaka, Bianca Andreescu leh Stan Wawrinka te chu duhsak takin wildcard pek an ni.

United States Tennis Association chuan player pathumte hi wildcard an pek thu an ti chiang tawh. Japanese star Osaka hian 2018 leh 2020 khan nomawi a chawi a, major title pali a lak zinga pahnih chu US Open nomawi a ni.

Canadian star Andreescu pawhin 2019 khan New York khawpuiah hian hlawhtlinna a lo chang tawh a, hliam vangin a hnu lamah ngai a awm hleithei meuh lo a ni. Hnungzâng na vangin thla kua ngawt a chawl a, chumi hnuah French Open rawn khel thei ve leh tawh mah se ngai erawh a la awh thei rih lo.

Wawrinka pawh US Open2019 champion a ni a, a hnu lamah Grand Slam title dang a la hlawh chhuak leh lo. Player pathum te hian tun hnaiah result ṭha an neih lohna a rei tawh a, an ranking a hniam avangin US Open main draw khel turin an tling lo.

US Open thuneitu lam chuan tun hma lama an sulhnu en letin, player pathumte hian qualifying khelh hah kher ngai loa main draw khelh nghal a phuah an ngai - chuvangin inelna an hmachhawn thei nghal dawn a ni.

Hard court inelna lian US Open hi tun thla chawhnu lam aṭanga khelh ṭan tur niin, season dang ang bawkin September thla tir lamah a tawp leh ang.