Gallagher a chhuak leh rih lo!

Chelsea aṭangin Atletico Madrid a pan dawn emaw tih hnuah Conor Gallagher a kir leh a, a club ngai Blues tan bawk season thar a hmang chhunzawm leh dawn ta zawk niin a lang.

England international hi La Liga club nen pound maktaduai 34.5 zetin an inrem a, ni nga chhung ngawt chu Madrid khawpuia Hotel-ah pawh a lo va chham hman. Metropolitano Stadium-ah pawh a hmel a inlan hman hial.

Mahse, Atletico Madrid hian Manchester City aṭangin Julian Alvarez chu pound maktaduai 81.5 tehmeuhin an lei a, player dang lei leh tur chuan an neih sa an hralh ṭhen phawt a ngai niin an sawi.

Atletico leh Gallagher inkar hi tunah chuan a tawp rih angin a lang, mahse tawp fel vek erawh a la ni lo. Spanish club hian an player Joao Felix chu Chelsea hnena hralh an tum ve thung a, club pahnih indawrna hian a la nghawng thei ang.

Kum 24 mi Gallagher hian Staford Bridge-ah thla 11 daih chiah contract a nei tawh, nipui bazar lehpekah a thlawn a chhuah tir ai chuan Chelsea hian man neia hralh an duh zawk a ni.