Fiahna paltlangtu Sinner

Mipa tennis world number 1 Jannik Sinner chuan Cincinnati Masters a match hmasa berah fiahna a paltlang. A khingpui Alex Michelsen-a'n break point vawi riat ngawt a hmuh hnuah 6-4, 7-5 in a hneh hram.

Italian tlangval Sinner hian tun hmain Cincinnati Masters-ah hian sulhnu ropui tak a la nei ngai lo, third round a la kalpel ngai lo a ni. Kuminah sulhnu ṭha neih ngei a tum - vawiina kum 23 tling tur hian phur takin inelna a hmachhawn chhunzawm ang.

Sinner chuan, "Inkhel hautak tak a ni. Tun hma chuan he hmunah hian inkhelh harsa ka ti thei hle, tun ṭumah harsa tak maia round sang zawk ka lut thei hi ka lawm, inrintawkna pawh min siamsak ngei ang," a ti.

Mipa singles inkhel dangah Daniil Medvedev erawh a chak lo - Russian star hian Jiri Lehecka chu 7-6 (7/2), 6-4 in a ngam lo. Kar hmasa khan Montreal lamah a match hmasa berah a chak lo nghal tawh bawk.

Seeded pakuana Stefano Tsitsipas erawh a chak - Greek tlangval hian Jan-Lennard Struff chu 4-6, 6-4, 6-3 in a hneh. Seeded pakuana Casper Ruud pawhin Aleksandar Kovacevic chu 6-3, 6-1 in a hneh a, a match lehpekah Felix Auger-Aliassime a hmachhawn ang.

Hmeichhe inelna lamah world number 1 Iga Swiatek pawhin fiahna hautak ang reng tak a hmachhawn a, a paltlang hram. Polish nula hian Varvara Gracheva chu 6-0, 6-7 (8/10), 6-2 in a hneh.

Swiatek chuan, "Set hnihna kha a harsa zual hle, ka khingpui khan hlauh nei miah loin a khel a, chuvangin ka tan chuan a harsa a ni. Hun remchang ṭha vawi khat lek hmuh pawh a harsa a ni a, chutiang kara ka tlang avangin ka lawm," a ti.