Mourinho a lungawi lo

Champions League qualifying aṭangin Fenerbahce an tla a, an chak loh danah coach Jose Mourinho a lawm lo hle - referee thutlukna dik lo an tuar niin ngai mah se a sawi lang duh lo thung.

Fenerbahce leh Lille an inhmachhawn a, hun tawp dawnah Ligue 1 club hian penalty hmuin Jonathan David chuan a khung, inkhel pahnih belhkhawmah 3-2 a chakin an tlang theih phah.

Team pahnih te an inkhel tawk hle a, extra time tawp dawnah pawh 2-2 in an la intluk tawk. Mahse, minute 118-naah handball vangin Fenerbahce hian penalty an chawi. Video assistant referee (VAR) hman a nih hnuah penalty hi pek tlang an ni.

Mourinho chuan, "Khatiang thil a thlen kha chuan kan tan Champions League champion nih ngaihna a awm lo a, UCL final khelh theih pawh a ni lo ang," a ti a, referee thutlukna chu mei nei tak mah se lang si loin a sawi zui.

Portuguese manager chuan sawizawmin, "Europa League kan khelh a ngai dawn, he inelnaah pawh hian kan chungah eng nge lo thleng dawn ka sawi lawk thei lo a, ka sawi vek thei lo bawk.

"Ka sawi vek theih loh chhan chan chu tun hma lama AS Roma leh Sevilla ten final kan khelh tawh kha chhut let mai rawh u," a ti. Italian club hi final luh pui mah se referee thutlukna vangin an chak lo niin a lo sawi tawh a ni.

Kumin January thla khan Roma hian Mourinho hi an ban a, June thla aṭang khan Fenerbahce a enkawl - a kalna lam apianga titi a ti tam chhunzawm zel dawn niin a lang.