Juve chhuahsantu Szczesny

Goalkeeper Wojciech Szczesny chuan Juventus a chhuahsan - Poland international hian season khat daih contract la nei mah se Old Lady nen hian inhriatthiam tawnna in an ti tawp.

Kum 34 mi Szczesny hian Juventus tan season sarih chhung a khel hman, season thar aṭang erawhin club dang tan a khel ang. Serie A club Monza nen sawi zawm a ni a, hei bakah hian Saudi Pro League club Al Nassr hming a ri bawk.

Juventus chuan thuchhuah siamin, "Wojciech Szczesny hi club tana mi inpe leh hlawhtlinna hrang hrang min chanpuitu a ni a, a thil tihte avangin keini chuan kan hre reng tawh dawn a, a chungah kan lawm - a hma hun atan duhsakna kan hlan," a ti.

Old Lady tan Szczesny hian match 252 a khelhsak a, Serie A leh Coppa Italia nomawi vawi thum ve ve a chawipui hman. A hmun ruakah hian Monza aṭanga an lakluh Michele Di Gregorio a ding thung ang.

Italian football inelna sang ber Serie A an ṭan leh dawn hnai, tun kar tawpah an khel ṭan ang. Juventus erawhin August 19, Thawhṭanni zanah an match hmasa ber atan Como an mikhual dawn a ni.