Champions League khelh tum inlan zan
Arsenal, Manchester United leh Liverpool te hi English club lian an ni a, Premier League champion tura rinkai an ni tawh lo. Season thara Champions League khelh tumin club lian pathumte hi an inel mek. Kartawpah FA Cup a awm dawn avangin zaninah Premier League inkhel a awm dawn.
Southampton-in nizan khan Crystal an hmachhawn a, Saints bakah zanina Swansea City hmachhawn tur Tottenham Hotspurs te hi season thara Champions League khelh tumte an ni.
Chelsea leh Manchester City te dinhmun a ṭhat tawh avangin club pahnih tan chauh hmun a awm a, tling pha lo a awm dawn.
Pathumnaah Arsenal
Arsenal-in pathumna dinhmun hauh zel turin Queen Park Rangers an hneh a ṭul.
Loftus Road-ah tla hlau QPR-in champion beiseina tlem nei Arsenal an hmachhawn dawn a, a hmuhnawm dan a danglam ang.
Kartawpa khel ve lo QPR an vannei a, an hnuaia awm Burnley leh Aston Villa an chak loh avangin table-ah 17-naah an la awm chhunzawm zel a, an la him chiah chiah.
Champions League-ah Arsenal-in Monaco hneh lo mah se kartawpah Everton an hneh a, inrintawkna nen QPR an hmachhawn thei ang. Arsenal hian an match hnuhnung pathumah QPR hi an hneh vek.
Arsene Wenger-a'n German defender Per Mertesacker aiah January transfer-a a lak luh Gabriel Paulista a ring zawk a, Brazilian defender hian inrintawkna a ngah tulh tulh.
Midfielder Jack Wilshere, Mikel Arteta leh Mathieu Flamini te chhawr theih dawn lo mah se Aaron Ramsey a dam tawh a, Everton an hneh ṭuma hmaia inhliam Francis Coquelin a inlan theih a beiseiawm bawk.
Arsenal hian Thawhṭanni zan FA Cup quarterfinal-ah Manchester United an hmachhawn dawn a, hei vang hian QPR hmachhawn turin Wenger-a tan starting eleven thlan thiam a pawimawh ang.
United leh vanneihna
Zanin hian Manchester United-in an striker Robin van Persie tel loin St James Park an tlawh dawn a, Wayne Rooney-a'n striker goal khung thei a ni tih lantirna hun a nei zel dawn tihna a ni.
Rooney bakah Radamel Falcao-a'n contract nghet ziak turin a theihna a phochhuah a hun tawh a, amaherawhchu tuna United khelh dan phungah chuan Colombian forward tan chet ṭhat a har ang.
Dutch manager Louis van Gaal-a hnuaiah United hian game mawi lantir lo mah se vanneihna nen khelh fuh loh niah point thum an hlawhchhuak fo a, champion tur khawpin an khel ṭha lo nachungin player ṭha an tam avangin Champions League khel tura rinkai chu an ni.
Newcastle hian an manager John Carver-a hnuaiah league match hnuhnung pangaah vawi khat chiah an chak lo. Alan Pardew thlaktu Carver hian game nalh aiin point a ngai pawimawh hmasa a, United tan a awlsam lo ang.
John Carver chuan, "Kan game a nalh tawk lo a, tla lo turin theihtawp kan chhuah a ni tawp. Engtin pawhin chak ila pawi tihna kan nei lo. Point thum hlawhchhuak turin theihtawp kan chhuah dawn," a ti.
Head to head-ah Manchester United an chungnung a, an inhmachhawn hnuhnung paruk zinga pangaah hnehna an chang.
Gerrard a dam tawh
Liverpool-in Pathianni zan khan Anfield-ah champion tum Manchester City an hneh tawh a, zanin hian Turf Moor-ah tlak hlau Burnley an hmachhawn dawn. Liverpool tan awlsam hret tura ngaih nimah se rinkai zawk an nih avangin goal a luh lawk loh chuan pressure an nei thei ang.
Liverpool captain Steven Gerrard inkhel turin a dam tawh a, amaherawhchu coach Brendan Rodgers-a'n Inrinni zana FA Cup quarterfinal-a Blackburn Rovers an hmachhawn hun atan a dah ṭha thei bawk.
Brendan Rodgers-a team hian league-ah match 11 chhung hneh loh an tawng lo a, heng match pariatah hian hnehna an chang. Liverpool-in rawlthar duhawm Jordan Ibe chu khup hliam vangin an chhawr thei lo a, player che ṭha Philippe Coutinho leh Adam Lallana te inlan ngei tura ngaih an ni.
Relegation Zone-a awm mek Burnley hian kartawp khan Swansea an hneh lo a, league-ah match ruk chhung chak hmel an hmu tawh lo.
Burnley manager Sean Dyche chuan, "Team chhungah hmasawnna tam tak kan nei a, Liverpool hmachhawn a, kan theihna lantir hi tuna kan mamawh tak a ni. Kan tum kan chiang a, chak ngei kan duh," a ti. Premier League-ah Liverpool hian kum 2015-ah chak loh an la nei lo a, kuminah point an hmu tam ber.
Zanin Inkhel Tur
QPR 1:15 AM Arsenal
West Ham United 1:15 AM Chelsea
Manchester City 1:15 AM Leicester City
Newcastle United 1:15 AM Manchester United
Stoke City 1:15 AM Everton
Tottenham Hotspur 1:15 AM Swansea City
Liverpool 1:30 AM Burnley