Shearer-a lim siam dawn
Zawlnei ama khuaah chawimawiin a awm ngai lo tih letling chiahin, England striker ropui Alan Shearer chu a chenna khua Newcastle-ah chawimawiin a awm a, a lim an siamsak dawn.
Shearer hian a naupanlai chuan Southampton-ah inkhelh a zir ṭhin a, Saints-ah hian a football nun bul ṭan chhoin chumi hnuah a hun laia English club ṭha Blackburn Rovers leh Newcastle United tan a khel chhunzawm.
Kum 44-a upa Shearer hian England tan age level-ah game 11 khelin goal 13 a khung a, senior level-ah ram tan game 63 khelin goal 30 a khung bawk a ni.
Kum 1988-1992 chhung khan Southampton tan khel in match 118 a khel tling hman a, Saints tan goal pawh 23 a khung. Hemi hnu hian Blackburn-ah a insawn a, kum 1992-1996-ah khan match 138 khel leh in goal thun a chhun zawm zel a, a club tan hian goal 112 lai a thun hman a ni. Blackburn hi kum 1994-95 season khan English Premier League-ah a champion pui nghe nghe. Blackburn champion ṭum hian Shearer hian goal 34 lai a khung.
Club pahnih tan a khelh hnu hian hetih hunlai a England club ṭha ber te zing a mi Newcastle chu pound maktaduai 15-in a zawm a, a hun laia world transfer record a ni. Newcastle tan hian kum 10 chhung a khel a goal 148 tehmeuh mai a khung. Inelna hrang hrangah match 559-a khelh aṭangin goal 283 a khung a, Newcastle-ah hian a career hun tawp a hmang.
English Premier League-ah bik goal 260 a khung hman a, ani aia khung tam hi an la awm ngai lo a, a record khum thei hi an awm mai pawhin a rinawm loh hle. Amah hnaih bertu Andrew Cole chuan goal 187 a, goal 73 zetin Shearer hi a pha lo a ni.
Premier League goal khung tam te
1 Alan Shearer 60
2 Andrew Cole 187
3 Wayne Rooey 183
4 Frank Lampard 176
5 Thierry Henry 175
Hetiang tak a player ṭha chungchuang bik a nih avang hian miten an ngaisangin an zah em em a, ama chenna khuahah ngei amah chawimawi nan a lim siam an tum ta a ni.
Shearer a lim hi dar (Bronze) hmanga siam tur a ni a, a siam tur hian Northumberland artist Tom Maley-a chu biak fel a ni tawh, ani hian milim 9ft 6' hi thla li chhungin a siam zawh hman beisei a ni. A sum senso zawng zawng hi Magpies chairman hlui Freddy Shepherd chhungkhuain an tum vek dawn a, sum ngai zat tur erawh tarlan a ni lo.
Shepherd chuan, "A dinna hmun tur hi kan la thlang fel thei rih lo a, Exhibition Park Museum-ah dah kan han tum deuh a, mah se thutlukna kan la siam fel lo a, ruahmanna a kal mek zel a ni. A hlut lehzual theih nan mipui tam thei ang berin an hmuh theihna hmunah dah kan duh," tiin a sawi.